1924թ. այս օրը մահացավ դերասանուհի Երանուհի Գարագաշյանը:
Ծնվել է 1848թ. Կ.Պոլսում, որտեղ ստացել է նախնական կրթությունը, ավարտել է 1861-ին։ Բեմական ասպարեզ է մտել 1865-ին՝ «Մեծն Տրդատ» պիեսում կատարելով Աշխենի դերը։ Առաջին մեկ-երկու թատերաշրջանում գերազանցապես խաղացել է արական դերեր, Ինչպես Պողի դերը «Պող և Վերգինե» պիեսում, Հովսեփ Գեղեցիկի դերը համանուն պիեսում և այլն։
Նրա բեմական գործունեության ամենափայլուն շրջանն սկսել է 1867-ից, երբ դարձել է Հ. Վարդովյանի թատերախմբի պրիմադոնա դերասանուհի և բոլոր ներկայացումներում հանդես է եկել առաջնակարգ դերերով, ինչպես Սանդուխտ («Սանդուխտ կույս»), Անժելիք («Նեղսիրտ բարեգործը»), Հայկանուշ («Կործանումն Ռուբինյան թագավորության»), Թեոդորա («Վենետիկուհին») և այլն։ 1878-ին միացել է Ս. Պենկլյանի օպերետային խմբին, շրջել է մի շարք քաղաքներում:
Հանդես է եկել Տիգրան Չուխաճյանի և թարգմանական մի քանի օպերետներում։ 1880-ին իր քրոջ՝ Վերգինե Գարագաշյանի հետ եկել է Թիֆլիս, մեկ թատերաշրջան խաղացել է Թիֆլիսի հայկական խմբերում, Պետրոս Ադամյանի, Սիրանույշի և այլ պոլսահայ դերասանների հետ։ Հաջորդ թատերաշրջանից նորից վերադարձել է Պոլիս, Ս. Պենկլյանի խմբի հետ մեկնել է Եգիպտոս, այնտեղից անցել Բալկանյան երկրներ։
1887-ին վերադարձել է Պոլիս, միառժամանակ թողել բեմը, ապա մասնակցել Կահիրեում կազմակերպված մի շարք ներկայացումների, մեծ հաջողությամբ կատարելով Մարգարիտ Գոթիեի («Քամիելազարդ Տիկինը»), Մեդեայի («Մեդեա»), Կատարին Հովարդի (համանուն պիեսում) դերերը` արժանանալով եգիպտական մամուլի բարձր գնահատմանը։
1900-ականների սկզբին եկել է Թիֆլիս, ամուսնացել է և մինչև կյանքի վերջը ապրել այնտեղ։
