НГ. Բառոզուն առաջ է մղում Nabucco-ն

14 Հունվար, 2011 11:44

Դիտումներ՝ *

Ինրպես գրում է ռուսական Независимая газета թերթը, Եվրահանձնաժողովի նախագահ Ժոզե Մանուել Բառոզուի առաջին այցն Ադրբեջան նորից զարկ է տվել այս տարածաշրջանից էներգակիրների արտահանման նոր ուղիների կառուցմանը, որոնք այդ պաշարները կհասցնեն Եվրոպա` շրջանցելով Ռուսաստանը: Բաքու կատարած այցի ընթացքում ընթացան բավականին հաջող բանակցություններ, և արդյունքում ստորագրվեցին մի շարք հիմնարար փաստաթղթեր. «ԵՄ-Ադրբեջան. Համագործակցություն հանուն արդիականացման» համատեղ հռչակագիրը, որը կաջակցի Ադրբեջանում քաղաքական և տնտեսական բարեփոխումներին, ինչպես նաև Հարավային միջանցքի ստեղծման մասին հռչակագիրը:
Երկրորդով, փաստորեն, քաղաքական աջակցություն է հայտնվում Nabucco-ի կառուցմանը, որով Եվրոպան տարեկան կարող է ստանալ 30 մլրդ խորանարդ մետր գազ:
Այսօր Բառոզուն կլինի Աշգաբադում, որտեղ բանակցություններ կվարի այդ երկրի նախագահ Գուրվանգուլի Բերդիմուխամեդովի հետ: Ոչ ոք չի կասկածում, որ Թուրքմենստանում բանակցությունները հաջողությամբ կավարտվեն։ Դրանով զարկ կտրվի Ռուսաստանը շրջանցող գազատարի կառուցմանը` լուրջ հակակշիռ դառնալով «Հարավային հոսք» ռուսական ծրագրին: Իսկ ինչ վերաբերում է ԱՄՆ-ում Իտալիայի դեսպանի այն հայտարարությանը, թե «Հարավային հոսքն» ու Nabucco-ն կարող են միավորվել, ապա դա, ըստ փորձագետների, հավանաբար դեսպանի անձնական կարծիքն է: Այդ են վկայել նաև Եվրահանձնաժողովի և ադրբեջանական պաշտոնյաների հայտարարությունները, որոնք անմիջապես հետևել են Իտալիայի դեսպանի հայտարարություններին:
Հիշեցնենք, որ Nabucco նավթամուղը կանցնի Թուրքիայի տարածքով, ապա, մտնելով Բուլղարիա, Ռումինիա և Հունգարիա, կհասնի Վիեննայի գազաբաշխիչ ցանց: Դրա կառուցումը կսկսվի 2012 թ. և կավարտվի 2015 թ.: