«Reurters» գործակալության հաղորդմամբ, ՌԴ ԱԳ նախարար Սերգեյ Լավրովը, անդրադառնալով իրանական իշխանությունների՝ Իրանի միջուկային կենտրոններ այցելելու հրավերին՝ հայտարարել է. «Իրանի հրավերը շատ ուշագրավ ու կարևոր է, բայց չի կարող փոխարինել ՄԱԳԱՏԷ-ի հետաքննություններին ու «վեցյակի» հետ ունեցած բանակցություններին»:
Իրանը օրեր առաջ մի շարք երկրների հրավիրեց այցելել իր միջուկային կենտրոններ՝ այնտեղ կատարվող աշխատանքներին ծանոթանալու նպատակով:
Մինչ այժմ ԵՄ-ն ու Չինաստանը հրաժարվել են իրենց ուղղված հրավերն ընդունելուց՝ հայտարարելով, որ նմանօրինակ այցելությունները ՄԱԳԱՏԷ-ի իրավասությունների սահմանում են:
Վերոհիշյալ այցելությունը պիտի տեղի ունենա հաջորդ շաբաթվա ընթացքում։ Մինչ այժմ միայն Եգիպտոսը, Վենեսուելան, Սիրիան ու Ալժիրն ընդառաջել հրավերին և այցելելու են Իրանի միջուկային կենտրոններ: