«Շնչեք ճիշտ, գոնե օրեկան 60 ռիթմիկ շնչառություն կատարեք, և եթե դրան զուգակցեք մեդիտացիան, կամ սովորական աղոթքը, ապա զերծ կմնաք շատ հիվանդություններից և կլինեք կենսուրախ ու երջանիկ»¸-սա մեդիտացիան գնահատող հայ մասնագետների խորհուրդն է հայությանը¸ իսկ ինչ է իրենից ներկայացնում մեդիտացիան եւ ինչ ազդեցություն կարող է գործել մարդու վրա:
Նախ¸մեդիտացիա բառացի նշանակում է մտասուզում: Միտքը, որ ցանկացած պահի առաջանում է մարդու մոտ, աշխատելիս, սնվելիս, քայլելիս, խոսելիս, մեր նյարդային համակարգի գլխավոր շարժիչն է: Այն կարող է մի քանի րոպեում մեր օրգանիզմում առաջացնել այնպիսի հաղորդիչներ, որոնք կարող են մի քանի վայրկյանի ընթացքում մեր մարմինը փոխել: Մեդիտացիայի, հատկապես տրանսցենդետալ մեդիտացիայի օգտակարությունը ստուգելու նպատակով, շատ երկրներում, հատկապես ԱՄՆ-ում անցկացված հետազոտությունների ժամանակ նկատվել է արյան մեջ խոլեստիրինի նվազում, զարկերակի ճնշման նորմալացում, ասթմայով, միգրենով, ստենոկարդիայով, նույնիսկ ինքնազգացողության լավացում, չարորակ ուռուցքներից տառապողների մոտ, հիվանդության ապաքինում: Իսկ ովքեր պրոբլեմներ ունեն քնելու հարցում, մեդիտացիան լրիվ կարգավորում է և նպաստում նյարդային համակարգի բարելավմանը:
«Ես տեղյակ եմ, որ Հայաստանում տրանսցենդետալ մեդիտացիայի կուրս անցել են շուրջ 30-40 հազար մարդ¸ իսկ թե նրանցից քանիսն են հիմա դեռ կատարում հատկապես տրանսցենդետալ մեդիտացիայի մեթոդով, ես չեմ կարող ասել, բայց ես 25 տարի այդ ուսմունքը կիրառում եմ և իմ առողջությունը պահպանում: 67տարեկան եմ, բայց ինչ Հայաստան եմ եկել չեն հավատում, ինձնից անձնագիր են պահանջում»,- մեզ հետ զրույցում նշեց վերջերս ԱՄՆ-ից վերադարձած մեր հայրենակից Գուրդեն Վարդյանը:
Գուրգեն Վարդյանի համոզմամբ` մեդիտացիայի ընթացքում մարդն առանց ջանք գործադրելու¸ առանց դեղորայքի կամ միջոցներ ծախսելու կարող է իրեն որոշակի ներդաշնակություն հաղորդել:
Հայաստանում Հիմալայան յոգայի ֆեդերացիայի նախագահ Արմեն Համբարձումյանը Առաջին լրատվականի հետ զրույցում նշեց¸ որ թեեւ Հայաստանում ամբողջ աշխարհի համեմատ` առայժմ չեն գիտակցում մեդիտացիայի օգտակարությունը¸ այնուամենայնիվ շարժ կա 1.5 տարի առաջվա եւ այսօրվա միջեւ: Նրա համոզմամբ` հայությունը ուղղակի շփոթում է մեդիտացիան կրոնական ինչ որ շարժումների հետ¸ ինչը լիովին անմտություն է¸ իսկ մյուս խնդիրն այն է¸ որ մեզ մոտ շատ քիչ են համապատասխան մասնագետները: