Աֆղանստանի «Թալիբան» շարժումը հայտարարել է, որ դադարեցնում է բոլոր տեսակի կապերը ԱՄՆ հետ:
Ինչպես հաղորդում է BBC-ն, թալիբներին այդ քայլին դրդել են Աֆղանստանում վերջին շրջանում տեղի ունեցած իրադարձությունները՝ Բահրամի ամերիկյան ռազմաբազայում Ղուրանի օրինակների այրումը և Քանդահարի շրջանում ամերիկացի զինծառայողի կողմից խաղաղ աֆղանների զանգվածային սպանությունը:
Այս իրադարձությունների պատճառով թալիբները հրաժարվել են քննարկել Կատարում շարժման գրասենյակ բացելու հարցը, որի միջոցով նախատեսվում էր երկխոսություն վարել ԱՄՆ հետ: Նրանք նաև սառեցրել են բանակցությունները՝ գերի ընկած ամերիկացի զինվորին իրենց շարժման 5 անդամների հետ փոխանակելու շուրջ:
Ավելի վաղ ենթադրվում էր, որ Կատարում բացվելիք գրասենյակի միջոցով թալիբներն ուղղակի բանակցություններ կսկսեն Վաշինգտոնի հետ՝ խաղաղության համաձայնագիր կնքելու շուրջ: «Թալիբանը» կտրականապես հրաժարվում է զրուցել Աֆղանստանի իշխանությունների հետ՝ նախագահ Համիդ Քարզային անվանելով ԱՄՆ-ի խամաճիկ:
ԱՄՆ պետքարտուղարությունը մեծ հույսեր էր կապում թալիբների հետ բանակցությունների հետ՝ Աֆղանստանից ամերիկյան զորքերի դուրսբերման նախօրեին: Վաշինգտոնը հույս ուներ դադարեցնել պատերազմը և կայունություն ապահովել երկրում:
Աֆղանստանի հարցով մասնագետները կարծում են, որ ամերիկյան զորքերի դուրսբերումից հետո նոր ուժով կվերսկսվի քաղաքացիական պատերազմը, որում թալիբների հաղթանակի հնարավորություններն ավելի մեծ են: