ՀՀԿ-ական գործարար պատգամավոր, ՀՖՖ նախագահ Ռուբեն Հայրապետյանը մայիսին կայանալիք խորհրդարանական ընտրություններին մեծամասնական ընտրակարգով չի առաջադրվելու, ավելին՝ եթե ընդգրկված լինի ՀՀԿ համամասնական ցուցակում, ապա կհրաժարվի։ Այսօր տեղի ունեցած մամուլի ասուլիսի ժամանակ ասաց նա՝ մեջբերելով նախագահ Սերժ Սարգսյանի խոսքը, թե՝ ՀՀԿ ցուցակում գործարարներ չեն լինի:
Ռուբեն Հայրապետյանի խոսքով՝ առաջադրման վերաբերյալ որոշումը փոխելու պատճառը զբաղվածությունն է, քանի որ ՖԻՖԱ-ի նիստերը հաճախ համընկնում են ԱԺ նիստերի հետ, ամսվա մեջ մի քանի անգամ ինքը ճամփորդությունների մեջ է լինում և այլն: Իսկ նման դեպքերում «ամեն մի դուրսպրծուկ իրեն ասում է, թե ինչու ես բացակայում» և շահարկում իր բացակայությունները:
Լրագրողներից մեկի հարցին՝ կեղծելո՞ւ է ընտրությունները, Ռուբեն Հայրապետյանը պատասխանեց. «Աղջիկ ջան, ես ե՞րբ եմ կեղծել, ես դրա մասին չեմ էլ կարող մտածել, լավ է՝ չեք ասում, որ ես էլ եմ կեղծիքներով ընտրվել»:
ՀՖՖ նախագահը միաժամանակ նշեց, որ ինքը թեև չի առաջադրվելու, բայց օգտագործելու է իր բոլոր լծակներն ու հնարավորությունները հանուն կուսակցության և նրա թեկնածուների:
Հայրապետյանի խոսքով, միակ մարդը, ով կարող է իրեն համոզել փոխել առաջադրման մասին որոշումը, իր լավագույն ընկեր, ԱԺ պատգամավոր Սամվել Ալեքսանյանն է:
«Հլը մի հատ դեմքիս ուշադիր նայեք, ես նմա՞ն եմ մարդու, որին կարող են ստիպել, իմ ընկերը կարող է ինձ համոզել, միակ մարդն ինքն է, որ կարող է համոզել, որին ես շատ եմ սիրում և հարգում: Ստիպել կարող է միայն հայրս, նա էլ չի ստիպում»,- ասաց ՀՖՖ նախագահը:
Հիշեցնենք՝ ավելի վաղ Ռուբեն Հայրապետյանը հայտարարել էր, որ չի ցանկանում առաջադրվել, այնուհետև նշել էր, որ կառաջադրվի որեւէ ընտրատարածքում, որտեղ իր պահանջարկը լինի: Նա նշել էր, որ չառաջադրվելու մասին որոշումը փոխել է, քանի որ կուսակցությունն է այդպես որոշել, իսկ ինքը անկախ մարդ չէ և հարգում է կուսակցության որոշումները:
