Մեր ունեցած տեղեկություններով, իշխանություններն արդեն պատրաստում են ցուցակներ, թե ովքեր են լինելու ապագա խորհրդարանի պատգամավորները և ովքեր` ոչ: Մասնավորապես հստակ է, որ այն յոթ պատգամավորները, ովքեր 2008թ. փետրվարի 22-ին միացել էին Լևոն Տեր-Պետրոսյանի համաժողովրդական շարժմանը և հանրահավաքի ժամանակ հայտարարել, թե միանում են ժողովրդին, այնուհետև փոշմանել և վերադարձել իշխանական ճամբար, 2012թ. Աժ-ում տեղ չեն ունենալու:
Հիշեցնենք, որ 2008-ին համաժողովրդական շարժմանը միանալու հայտարարության տակ իրենց անուններն էին գրել ՀՀԿ խմբակցությունից Մանվել Ղազարյանը, Արմեն Մխիթարյանը, Հրանտ Գրիգորյանը, Սեյրան Սարոյանը, ԲՀԿ-ից՝ Կարո Կարապետյանը, Տիգրան Ստեփանյանը և անկախ պատգամավոր Ռուստամ Գասպարյանը, ով այժմ ԲՀԿ կուսակցության անդամ է:
Մեզ հետ զրույցում Տիգրան Ստեփանյանը հերքեց, որ 2008թ. ինքը միացել է համաժողովրդական շարժմանը. «Ու 2008թ. էլ իմ հետ կապված ոչ մի դեպքեր չեն եղել: Իհարկե ոչ, ոչ մի քայլ էլ չի եղել, ոչ մի ձևի, ինչ-որ մեկը կա՞ որ ինձ տեսել է այնտեղ: Նման բաներ չեն եղել, դա էնքան որ աղմուկ սարքեցին: Ես հերքել եմ այդ ամենը»:
Նա նաև նշեց. «Ո՞վ է ասել, որ ես չեմ դառնում պատգամավոր: Ես նման ինֆորմացիա ձեզանից եմ լսում: Ես մեկնաբանություն չունեմ, ես առաջադրվելու եմ, իմ թեկնածությունն առաջադրելու ոչ մի խնդիր չունեմ ոչ մեկի հետ»:
Թիվ 21 ընտրատարածքի պատգամավոր, ԲՀԿ-ական Ռուստամ Գասպարյանն էլ, չհասկանալով, թե այդ ինչ ցուցակների մասին է ասաց. «Ես չկամ ցուցակում և ցուցակում չեմ էլ ուզում լինեմ, ես էն ժամանակ էլ դրել եմ մեծամասնականով, հիմա էլ կդնեմ: Անցած անգամ էլ ես չկայի էդ ցուցակում, դե գիտեք ես Բարգավաճ կուսակցությունից եմ, Դուք Հանրապետական ցուցա՞կն ի նկատի ունեք»:
Գասպարյանն ասաց, որ 2008-ին ինքը չի միացել Լևոն Տեր-Պետրոսյանին. «Ես գրել եմ, որ ես ժողովրդի հետ եմ: Ցուցակները հաստատ ինձ չեն խանգարելու, քանի որ ես անցած անգամ էլ դրեցի իշխանության թեկնածու Ալիկ Պետրոսյանի դեմ ու հաղթեցի: Իհարկե, դեռ առջևում ժամանակ կա, եթե նպատակահարմար գտնեմ, որ ինձ նորից պետք է թեկնածություն դնել, ապա անպայման կդնեմ ու կպայքարեմ»: