Լիբանանում սկսվել է քաղաքական ճգնաժամ, քանզի կառավարությունը դադարեցրել է իր գործունեությունը ընդդիմադիր «Հիզբոլլահ» կուսակցության 11 նախարարների հրաժարականի պատճառով:
Լիբանանի Սոցիալ-դեմոկրատ հնչակյան կուսակցության փոխատենապետ Ալեքսան Քեոշկերյանի փոխանցմամբ, առաջիկայում նախագահ Միշել Սուլեյմանը պետք է նոր վարչապետ նշանակի, որն էլ կսկսի կառավարություն ձևավորելու բանակցությունները. «Վստահ եմ, որ Սաադ Հարիրիից զատ, այլ թեկնածու երկրի համար չկա: Չմոռանանք, որ վարչապետ պետք է լինի սուննի համայնքի ներկայացուցիչը, իսկ այնտեղ բացարձակ մեծամասնություն են հենց Հարիրիի կողմնակիցները»:
Քեոշկերյանը տեղեկացրեց, որ Լիբանանի խորհրդարանի նախագահ Բըրին ընդդիմության կուսակցության անդամ է և հանդես է եկել հայտարարությամբ, որ պետք է ամեն ինչ անել փողոցային բախումներից խուսափելու և սահմանադրական ճանապարհով խնդիրը լուծելու համար: «Սակայն մենք խոսում ենք Լիբանանի մասին, որտեղ քաղաքական բախումները նորություն չեն, ուստի ամեն ինչ հնարավոր է»,- ասաց Լիբանանի ՍԴՀԿ փոխատենապետը:
Վերջին զարգացումների կապակցությամբ Լիբանանի հայկական կուսակցությունների դիրքորոշումների մասին խոսելիս Ալեքսան Քեոշկերյանն ասաց. «Հայկական կուսակցությունները կողմեր են ներկայացնում` մեծամասնության և փոքրամասնության: Հնչակյանները մեծամասնություն են և դաշնակից են Հարիրիի հետ, իսկ Դաշնակցությունը «Հիզբոլլահի» կողմնակիցն է: Սակայն յուրաքանչյուր պարագայում հայկական համայնքը երբեք կողմ չի եղել բախումներին»: