Արարատի զորամասերից մեկի գումարտակի հրամանատար, «Ռոժ» մականունով Վարդան Մարտիրոսյանը, ով կասկածվում է պայմանագրային զինծառայողներից գումարներ հավաքելու մեջ այժմ գտնվում է իրենից տուժած Նարեկ Այվազյանի /նրան ծեծել էին, անօգնական թողել, այժմ մեղադրում են մարտական հերթապահության կանոնները խախտելու մեջ/ կողքին` «Նուբարաշեն» ՔԿՀ-ում: Սպա Նարեկի մայրը զանգահարել էր մեզ խմբագրություն եւ ասել, որ Ռոժն իր որդու միջոցով էլ է փորձել 500.000 դրամի վարկ վերցնել«ԱԿԲԱ-ԿՐԵԴԻՏ ԱԳՐԻԿՈԼ» բանկից, սակայն Նարեկը չի համաձայնել: Դրանից հետո որդու դեմ լարվել են: Նարեկի մայրը` Աիդա Այվազյանը, ասաց, որ իր որդուց կոնկրետ գումար ուզողը այժմ կալանավորված, նույն զորամասի գնդի հրամանատարի` անձնակազմի հետ տարվող աշխատանքների գծով տեղակալ, փոխգնդապետ Արթուր Կարապետյանն է եղել, ով իր որդու գլուխը խփել է պատին, երբ մերժում է ստացել: Տեղեկություններ եղան մամուլում, որ վերջինս պայմանագրային զինծառայողներից շորթել է 90 մլն դրամ եւ ոչ թե 1 մլն, ինչպես որ մինչ այդ հաղորդում էին որոշ լրատվամիջոցներ: Ըստ այդ տեղեկությունների՝ «Ռոժ» մականունով Վարդան Մարտիրոսյանը ստիպել է զինվորականներին իր համար «ԱԿԲԱ-ԿՐԵԴԻՏ ԱԳՐԻԿՈԼ» բանկից մինչեւ 500 հազար դրամի վարկեր վերցնել, սակայն աշխատավարձով ապրող զինվորականները պարտքերը չեն կարողացել մարել, եւ լուրջ խնդիրներ են առաջացել: Այս բացահայտումներից հետո պայմանագրային զինծառայողներից գումարներ հավաքող հրամանատարին ետ են կանչել Մոսկվայից, որտեղ նա վերապատրաստման կուրս էր անցնում, եւ ձերբակալել: Ի դեպ, Վարդան Մարտիրոսյանը ԶՈՒ գլխավոր շտաբի պետ Յուրի Խաչատուրովի եւ նրա որդու` Գրիշա Խաչատուրովի հովանավորյալն է: Քրգործ է հարուցված քր. օր-քի 375 հոդվածի առաջին մասի հատկանիշներով` պաշտոնատար անձի կողմից իշխանությունը չարաշահելը, եթե այդ արարքները կատարվել են շահադիտական նպատակներով: