ՀՀ Ազգային ժողովի նախագահ Սամվել Նիկոյանը մարտի 14-ին հանդիպել է Երևանի պետական համալսարանի, Գիտությունների ազգային ակադեմիայի, Երևանի «Գլաձոր» համալսարանի ուսանողների հետ: Վերջիններս խորհրդարանում են անցկացնում իրենց ուսումնական պրակտիկան:
ԱԺ նախագահի խոսքերով` օրենսդիր մարմինն այն միջավայրն է, որտեղ ուսանողները կարող են շփումներ ունենալ ամենատարբեր մասնագիտություններ ունեցող մարդկանց, այդ թվում` լավագույն իրավաբանների, տնտեսագետների, քաղաքագետների հետ: Խորհրդարան այցելելով` ուսանողները հնարավորություն ունեն ճշգրտորեն պատկերացնել և գնահատել Ազգային ժողովի գործունեությունը: ԱԺ նախագահը սա կարևոր է համարել այն համատեքստում, որ հասարակության մեջ հիմնականում մամուլն է կարծիք ձևավորում, հաճախ` կանխակալ:
ԱԺ նախագահը երիտասարդների հետ զրուցել է հակաքարոզչության և ինքնաոչնչացման դրսևորումների անթույլատրելիության մասին` փոխարենը օգտակար համարելով առողջ քննադատությունը: Որպես թիրախ դարձած ոլորտներ` խորհրդարանի ղեկավարը նշեց Հայոց բանակը և Հայ առաքելական եկեղեցին, երբ առաջին դեպքում փորձ է արվում խարխլել ազգային անվտանգության հիմնական սյունը և երկրորդ դեպքում` ինքնապահպանման և արժեհամակարգի կարևոր հիմքը: Պարոն Նիկոյանը մտահոգիչ և պետության համար վտանգավոր է համարել, երբ քննադատում են ամեն ինչ` տեղ չթողնելով հավատին: «Դուք երիտասարդ եք, նոր եք կյանք մտնում: Ապրեք հպարտությամբ, որ հայ եք, հին գենի կրողներն ու քաղաքակրթություն ստեղծող ժողովրդի զավակները»,- հորդորել է նա երիտասարդներին:
Ներկայացնելով օրենսդիր մարմնի գործունեությունը` ԱԺ նախագահը նշել է, որ խորհրդարանը լիովին իրականացնում է Սահմանադրությամբ նախանշված լիազորություններն ու պարտականությունները, նաև` պահպանում իշխանության երեք թևերի միջև հավասարակշռումների և հակակշռումների մեխանիզմները:
ԱԺ նախագահի հետ զրույցում ուսանողներն անդրադարձել են քաղաքական, հասարակական, տնտեսական տարբեր հարցերի: Երիտասարդների խնդրանքով պարոն Նիկոյանը խոսել է մեծամասնական-համամասնական ընտրակարգերի խնդրի մասին` ասելով, որ գործող հարաբերակցությունն ամենաարդյունավետն է: Երիտասարդական խորհրդարանի ստեղծման նպատակները ներկայացնելով` ԱԺ նախագահն այն բնորոշել է որպես երիտասարդ գործիչներ պատրաստելու լավ դպրոց, օգտակար համարել երիտասարդների խորհրդատվական ձայնը որոշումներ կայացնելիս:
Խորհրդարանի ղեկավարին հարց են ուղղել նաև պատգամավորի հետկանչի մեխանիզմներ ներդնելու նպատակահարմարության մասին: Ըստ պարոն Նիկոյանի` պետք է ձեռնպահ մնալ նման մեխանիզմներից, քանի որ դրանք կարող են իշխանությունների ձեռքում քաղաքական հայացքների համար հետապնդելու գործիք դառնալ: Նույն այս տրամաբանությամբ է Սահմանադրությամբ երաշխավորվել նաև պատգամավորների անձեռնմխելիությունը:
ԱԺ հասարակայնության և տեղեկատվության միջոցների հետ կապերի վարչությունից «Առաջին լրատվական»-ին տեղեկացնում են, որ ԱԺ նախագահը հանդիպման վերջում երկուստեք ուսանելի համարեց այս ձևաչափով հանդիպումները, նշելով, որ յուրաքանչյուր հարցադրման մեջ տեսնում է վաղը փոխարինելու եկող նոր սերնդի տեսակետը:
