«Ուզում եմ խոսել երկու բավական մտահոգիչ փաստերի մասին, որոնցով առանձնացավ անցած տարին»,- այսօր լրագրողների հետ հանդիպման ժամանակ ասաց ԱԺ ֆինասավարկային և բյուջետային հարցերի մշտական հանձնաժողովի նախագահ Գագիկ Մինասյանը: «Առաջինը գնաճի աննախադեպ բարձր ցուցանիշն էր, երկրորդը` գյուղատնտեսական արտադրանքի չափազանց մեծ անկումը: Մեկը մյուսով որոշակիորեն պայմանավորված էր, որովհետև գյուղատնտեսական արտադրանքի անկման զգալի մասը` 14.5%-ը, պայմանավորված էր անբարենպաստ բնակլիմայական պայմաններով, և հենց այդ նույն պայմաններով էլ պայմանավորված էր գնաճի բարձր մակարդակը` շուրջ 9.4%: Գնաճի մյուս պատճառը միջազգային շուկաներում գների աճն էր»,- ասաց Գ. Մինասյանը: Ըստ նրա՝ նախորդ տարի ներկրվեց բարձրորակ սերմացու Ռուսաստանից, ինչը թույլ կտա 1-2 տարվա ընթացքում հացահատիկով մեր ապահովվածությունը հասցնել մինչև 55%-ի` ներկայիս մոտ 30%-ի փոխարեն: