Վայոց Ձորի մարզպետարանը անօրինական է համարել Հովիկ Աբրահամյանին պատկանող ընկերության գործունեությունը

Վայոց Ձորի մարզպետարանն անօրինական է համարել «Արգամիկ» ընկերության գործունեությունը, որը Ելփին գյուղ ծանր տեխնիկա էր մտցրել Կեչուտ տեղամասում պղնձի պաշարների հետախուզման համար: «Կեչուտ» կոչվող տարածքում երկրաբանահետախուզական աշխատանքները իրականացվում են «Արգամիկ» ընկերության կողմից` ՀՀ էներգետիկայի և բնական պաշարների նախարարության կողմից 24.3.2009 թ. տրամադրված ընդերքի օգտակար հանածոների շահագործման նպատակով ուսումնասիրության թիվ 65/1 հատուկ լիցենզիայի հիման վրա, սակայն աշխատանքներն իրականացվում են Ելփին համայնքի ավագանու կողմից նշված տարածքը օգտագործման տրամադրելու համաձայնության և համայնքի ղեկավարի և «Արգամիկ» ՍՊ ընկերության միջև կնքված հողհատկացման պայմանագրի բացակայության պայմաններում»,- նշված է Վայոց Ձորի մարզպետարանի գրավոր եզրակացության մեջ (թիվ 01/10/4011-10): Դրանով խախտվել «Տեղական ինքնակառավարման մասին» ՀՀ օրենքի դրույթը (հոդված 16, 1-ին մաս, 2-րդ կետ): Ի դեպ, Ելփինի բնակիչներին ուղղված՝ ՀՀ նախագահի վերահսկողական ծառայության 2-րդ բաժնի վարիչ Հ. Փանոսյանի ստորագրությամբ պատասխանում (նամակ թիվ 20-7199, 16.09.2010թ.) նշված է, որ «Արգամիկ» ընկերությունը գործում է ՀՀ գործող օրենսդրության պահանջների համաձայն: Այս մասին ասվում է «էկոլուր» հասարակական կազմակերպության տարածած հաղորդագրությունում: «Նշենք, որ «Արգամիկ» ՍՊԸ-ն գրանցված է Արարատի մարզի Մխչյան գյուղում և, ըստ որոշ աղբյուրների, պատկանում է ՀՀ ԱԺ նախագահ Հովիկ Աբրահամյանին: Թեպետ ներկա դրությամբ ընկերությունը գյուղից դուրս է բերել ծանր տեխնիկան, բնակիչները շարունակում են անհանգստանալ, որ ընկերությունը և նրա հովանավորները կհասնեն իրենց ուզածին ու կվերսկսեն գործունեությունը: Հիմնական հարցը, որը նրանց մտահոգում է, գյուղի ջրամատակարարման հարցն է. ջրի աղբյուրները գտնվում են հանքավայրի տարածքում: Բացի այդ, այդ վայրերը հայտնի են յուրահատուկ բնությամբ և կենսաբազմազանությամբ: «ԷկոԼուր»-ը դիմում է ՀՀ բնապահպանության նախարարությանը և Վայրի բնության համաշխարհային հիմնադրամի հայաստանյան գրասենյակին՝ առաջարկելով քննարկել տվյալ տարածքի հարցը և հազվադեպ հանդիպող ու ոչնչացող տեսակների պահպանման համար ներառել այն Հայաստանի հատուկ պահպանվող տարածքների ցանկում»,- ասվում է «Էկոլուրի» հաղորդագրությունում: