Այսօր «Ձմեռային փառատոն 2010»-ի փակման արարողության ընթացքում միջոցառման կազմակերպիչների` «Կանաչաստան» ՀԿ-ի, Deem Communications-ի և Պողոսյան պարտեզների կողմից մրցանակներ և վկայականներ շնորհվեցին Կաղանդ պապի հեքիաթի և տոնածառերի մրցույթների հաղթողներին և մրցանակներին:
Հաղթողներին մրցանակները հանձնեց Կաղանդ պապը: Տոնածառերի մրցույթում հաղթող ճանաչվեցին «Ղողանջ» ՀԿ-ն և «ԱյԴիԷս» կազմակերպությունը:
Պողոսյան պարտեզների կողմից հատուկ մրցանակի արժանացավ «ԱյԴիԷս» կազմակերպությունը:
Ժյուրիի 10 անդամների կողմից հեքիաթների ստեղծման մասնագիտական անվանակարգում մրցանակ ստացավ Նաիրա Երիգարյանը, իսկ սիրողական հեքիաթ գրողների անվանակարգում մրցանակ ստացավ 82-ամյա Ժանետա Անանիկյանը:
Հատուկ մրցանակ տրվեց նաև «Տերյան» մշակութային կենտրոնին, որի օգնությամբ ստեղծվել է Կաղանդ պապիկի կերպարը:
Փառատոնի բոլոր մասնակիցները, կամավորները, գործընկերները, ժյուրիի անդամաներն ու հովանավորները ստացան սերտիֆիկատներ:
Այս տարի փառատոնի շրջանակներում անցկացվեցին մի շարք միջոցառումներ: Անցկացվեց «Երաժշտական օրեր» խորագիրը կրող հինգօրյա բազմաժանր համերգաշար, որի շնորհիվ փառատոնն ավելի երաժշտական երանգ ստացավ: Սիրահարների այգում կազմակերպվեցին նաև մանկապատանեկան 5 տարբեր բացօթյա խաղեր, որոնց մասնակիցների թիվն այս տարի հասավ մոտ 900-ի: «Փառատոնի շրջանակներում անցկացվեց նաև ավանդույթ դարձած բնապահպանական տոնածառերի ցուցահանդես մրցույթ, որին իրենց մասնակցությունն ունեցան 14 կազմակերպություններ իրենց 22 տոնածառերով»,- նշեց փառատոնի ղեկավար Րաֆֆի Նիզիբլյանը: