Ըստ Raiffeisen research–ի ներկայացրած հաշվետվության՝ իրանական կոնֆլիկտի սրացումը կարող է հանգեցնել նավթի գնի բարձրացմանը. մինչև 150 դոլար՝ մեկ բարելի դիմաց:
Barclays Capital բանկի տեղեկատվության համաձայն՝ Պարսից ծոցից օրական ներմուծվող նավթի ծավալները 400 հազարից դարձել են 300 հազար: Այս հանգամանքին նպաստել են Իրանի դեմ ԱՄՆ-ի և ԵՄ-ի սահմանած պատժամիջոցները:
«Շատերը մինչև հիմա կանխատեսում են, որ Իրանի և Արևմուտքի (ԱՄՆ, Իսրայել, Եվրոպա) միջև առկա կոնֆլիկտը կարող է սրվել: Այդ պատճառով մենք չենք կարող բացառել ո՛չ Իրանի գործողությունները, որը սպառնացել է փակել Հորմուզի նեղուցը, ո՛չ էլ արևմտյան պետությունների ռազմական միջամտությունը»,- ասվում է հաշվետվության մեջ:
Երկու սցենարները կարող են նպաստել նավթի գնի բարձրացմանը:
Վերլուծաբանների կարծիքով՝ նեղուցը փակելը կարգելափակի ծովային ճանապարհով տեղափոխվող նավթի մեկ երրորդ մասը:
Պենտագոնի ղեկավար Լեոն Պանետան անցյալ երեքշաբթի օրը չբացառեց, որ ԱՄՆ–ը ռազմական գործողություններ կարող է ձեռնարկել Իրանի դեմ, եթե այլ միջոցները չնպաստեն Իրանում միջուկային զենքի ստեղծման կանխարգելմանը:
