Այսօր լրագրողների հետ հանդիպման ժամանակ հայտարարվեց «Ձմեռային փառատոն 2010» փակումը: Փառատոնը մեկնարկել էր 2010թ դեկտեմբերի 25-ին Երևանի քաղաքապետարանի տարածքից Սիրահարների այգի տոնական շքերթով: Փառատոնի կարգախոսն է գունավորել հայաստանյան ձմեռային առօրյան: Խոսելով այս տարվա Փառատոնի ձեռքբերումների և բացթողումների մասին, փառատոնի հեղինակ Րաֆֆի Նիզիբլյանը նշեց, որ ամենամեծ ձեռքբերումը Կաղանդ պապիկի կերպարի վերստեղծումն է. «Փառատոնն արդեն իր խոսող կերպարն ունի` Կաղանդ պապը, կարծում եմ սա մեծ ձեռքբերում է, իսկ բացթողումներից կարող եմ ասել, որ շատ էինք ուզում բեմադրել Հիսուս Քրիստոսի ծնունդը, որ արել էինք անցյալ տարի, սակայն չստացվեց»:
Այս տարի փառատոնին մասնակցեց 6500 մարդ` նախորդ տարվա 7000-ի փոխարեն: «Անցյալ տարվա համեմատ այս տարի մասնակիցների թիվը մի փոքր քիչ էր, դա բացատրվում է նրանով, որ անցյալ տարի փառատոնը ավելի շուտ սկսվեց»,- նշեց փառատոնի հեղինակը: