Հարավային Սուդանի անկախությունը` Լեռնային Ղարաբաղի հարցի լույսի ներքո

ԱՊՀ երկրների ինստիտուտի հայաստանյան մասնաճյուղի նախագահ, քաղաքագետ Ալեքսանդր Մարկարովն այսօր անդրադարձավ Հարավային Սուդանի ինքնորոշման հարցին` Լեռնային Ղարաբաղի անկախության համատեքստում: Նախ անդրադառնալով Աֆրիկայում տեղի ունեցող քաղաքական խմորումներին` Ա. Մարկարովը կարծիք հայտնեց, որ հուլիսին` Հարավային Սուդանի անկախության հայտարարվելուց հետո, անկախության հանրաքվեի ճանապարհ կբացվի նաև մեկ այլ աֆրիկյան երկրում` Սոմալիլենդում: «Մեզ համար այս ամենում կարևոր է այն, որ արդեն որերորդ անգամ է միջազգային պրակտիկայում գործում է ազգերի ինքնորոշման իրավունքը, այլ ոչ թե որևէ այլ սկզբունք»,- մատնանշում է Ա. Մարկարովը: Ըստ նրա` Հարավային Սուդանի անկախության հարցում ինքնորոշման իրավունքի կիրառումը մեզ տալիս է ևս մեկ «հաղթաթուղթ»: Համեմատելով Հարավային Սուդանի և անկախություն հայտարարած մեկ այլ պետության` Կոսովոյի դեպքերը` քաղաքագետը նշում է, որ մի կողմից այս 2 դեպքերում կա տարբերություն, այն է` Սերբիան չի ճանաչել և առաջիկայում չի ճանաչի Կոսովոյի անկախությունը, իսկ Սուդանի դեպքում հանրաքվեն անցկացվել է Հյուսիսային և Հարավային Սուդանների փոխհամաձայնությամբ: Մյուս կողմից` երկու դեպքում էլ կիրառվել է նույն մեխանիզմը` հանրաքվեի անցկացումը: «Կոսովոն ավելի նման է Հարավային Օսիայի դեպքին, որտեղ ևս հանրաքվեն իրականացվել է` առանց Վրաստանի համաձայնության»,-հավելում է քաղաքագետը: Ա. Մարկարովի խոսքով, ի տարբերություն Ադրբեջանի` Հյուսիսային Սուդանում գիտակցում են, որ իրենց ավելի ձեռնտու է միասնական ու խաղաղ պետություն ունենալը: «Հյուսիսային Սուդանը համաձայնել է անկախության հանրաքվեի անկացմանը, քանզի ձգտում է կայուն և միասնական երկիր ունենալ: Նախագահ Ալ Բաշիրն այնքան բարի է գտնվել, որ նույնիսկ համաձայնել է ընդհանուր պետության 36 մլրդ արտաքին պարտքը չկիսել անկախացող հատվածի հետ»,- հիշեցնում է քաղաքագետը: