Տարաձայնություն Իսրայելում՝ Իրանի վրա հարձակվելու վերաբերյալ

Իսրայելական «Haaretz» օրաթերթի փոխանցմամբ, Իսրայելի ՊՆ Էհուդ Բարաքի ու բանակի շտաբի հրամանատար Գաբի Աշքենազին միջև լուրջ տարաձայնություն է սկսվել` Իրանի միջուկային կենտրոններին հարվածելու վերաբերյալ:
Օրաթերթի փոխանցմամբ, հրամանատար Աշքենազին համոզված է` յուրաքանչյուր պատերազմ Իրանի դեմ աղետալի հետևանքներ կարող է ունենալ Իսրայելի համար: Հետևաբար, Աշքենազին Նաթանյահուին խնդրել է, որ այդ հարցը քննարկելիս նկատի առնեն նաև իր մասնագիտական կարծիքը:
«Haaretz»-ի փոխանցմամբ, Իսրայելի ՊՆ Բարաքը հայտարարել է, որ այս տարի Աշկանազիի պաշտոնավարության պայմանագիրը չի երկարաձգվելու և նրան փոխարինելու է Գազայի հատվածում Իսրայելի բանակի հրամանատար Եալաֆ Գալանտը: Թերթի փոխանցմամբ, Գալանտը Աշքենազիի համեմատությամբ, ծայրահեղական է համարվում, և նրան չեն խոչընդոտելու Բարաքի ծրագրերը:
Փորձագետների կարծիքով, Իսրայելը բազմիցս է հայտարարել Իրանի միջուկային կենտրոններին հարվածելու իր մտադրության մասին, բայց Իսրայելը միայնակ չի կարող իրականացնել նման գործողությունները: Փորձագետները նաև համոզված են, որ վերջին շրջանում Իրանի ատոմական կենտրոններում տեղի ունեցած դեպքերի արդյունքում Իսրայելի ռազմատենչ ցանկությունները խիստ նվազել են:
Օրաթերթի կարծիքով, Իսրայելի կառավարությունը համոզված է, որ Իրանի դեմ դիվանագիտական ճնշումներ իրականացնելուն զուգահեռ նաև պիտի խոսել ռազմական հարձակման մասին, որը կօգնի դիվանագիտական ճնշումներն ավելի արդյունավետ դարձնել: Թերթը նաև մատնանշում է, որ վերջին շրջանում Իսրայելի անվտանգության և բանակային այն անձինք, որոնք ավելի չափավոր դիրքորոշում ունեն Իրանի նկատմամբ, հեռացվել են իրենց պաշտոններից: