Ինչպես փոխանցում է Paris Match թերթը, ֆրանսիական Լանժեակ քաղաքում հունվարի 10-ին քաղաքացիական հագուստով ժանդարմները ձերբակալել են վեցամյա մի տղայի` Վազգեն Ասրիյանին: Նրան բերել են Նիմ քաղաքի բանտ, որտեղ գտնվում է նրա հայրը` խորթ մոր հետ: Հայրը ձերբակալվել է բենզինի գողության համար: Վազգենի հորը անցած տարվա աշնանը մերժել էին ապաստարան տրամադրել, ինչը նա խնդրել էր Ռուսաստանից Ֆրանսիա տեղափոխվելուց հետո: Նա պատճառաբանել էր, որ Ռուսաստանում քաղաքական հալածանքների է ենթարկվել: Մեկ այլ աղբյուր հայտնել է, որ նա մասնակցել է հակապուտինյան հանրահավաքի, որից հետո նրա վրա ոստիկանները ճնշում են գործադրել:
Քաղաքի բնակիչները վրդովված են և ապշած, քանի որ անընդունելի է մանկահասակի դեմ այսօրինակ վարվելակերպը: Նրանք պատմում են, որ երեխայի հայրը շատ ակտիվ մասնակցություն է ունեցել քաղաքի հասարակական կյանքին: Նրանք երեքշաբթի օրը դպրոցի շենքի առաջ պիկետ են կազմակերպել:
Ոստիկանները հայտարարել են, որ իրենց բոլոր գործողությունները համապատասխանում են օրենքին, իսկ ընտանիքը գտնվում է մի շենքում, որտեղ կան կենսագործունեության համար նորմալ պայմաններ: