Այսօր լրագրողների հետ հանդիպման ժամանակ ԱԺ ֆինանսավարկային և բյուջետային հարցերի մշտական հանձնաժողովի նախագահ Գագիկ Մինասյանը ամփոփեց անցած տնտեսական տարին` նշելով ձեռքբերումներն ու կորուստները: Որպես առաջին կարևոր ձեռքբերում` նա նշեց արտահանման բարձր աճի տեմպը ներմուծման նկատմամբ, ինչը, ըստ նրա, մեր առևտրի մեծ բացասական հաշվեկշռի պարագայում չափազանց մեծ կարևորություն ունի: Որպես տնտեսական հաջողություն` նա նշեց նաև մի շարք «լուրջ ձեռնարկությունների գործարկումը»: «Առաջինը Երևանի ՋԷԿ-ն էր, որի գործարկումը թույլ տվեց էլեկտրաէներգիայի գները չբարձրացնել այն պարագայում, երբ բարձրացան գազի գները: Սա ապահովում է ոչ միայն էժան էլեկտրաէներգիա, այլև բնապահպանական առումով ավելի նախընտրելի է, քան մեր գործող մյուս ՋԷԿ-երը: Երկրորդը Ղափանում գործարկված նոր հարստացուցիչ կոմբինատն է, որը շատ ավելի ժամանակակից տեխնոլոգիաներով է աշխատում և շատ ավելի արդյունավետ է: Մյուսը տրանսպորտային միջոցների մարտկոցներ արտադրող գործարանի գործարկումն էր, վերջինը` շաքարավազի գործարանի գործարկումը»,- նշեց Գ. Մինասյանը` հավելելով, որ այդ նոր գործարաններից երկուսը հնարավորություն կտան իրենց արտադրած արտադրանքի գծով ներմուծող երկրից Հայաստանը դարձնել արտահանող երկիր: