Մարտի 10-ին Աբխազիայում կայացել է Ազգային ժողովի ընտրությունների առաջին փուլը: 35 տեղերին հավակնում էին 148 թեկնածուներ: Քվեարկությանը մասնակցել է ընտրողների 44.50%-ը: Ըստ նախնական արդյունքների՝ հայտնի են 13 հաղթողների անունները: Նորընտիր պատգամավորների թվում է նաև աբխազական ընդդիմության առաջնորդ Ռաուլ Հաջիմբան: Ընտրությունների երկրորդ փուլը տեղի կունենա 22 ընտրատարածքներում, որոնցից յոթը գտնվում է Սուխումում: Այս մասին «Առաջին լրատվական»-ը զրուցեց Աբխազիայի հայ համայնքի ղեկավար Սուրեն Կերսելյանի հետ:
– Պարոն Կերսելյան, մարտի 10-ին Աբխազիայում տեղի ունեցավ խորհրդարանի ընտրությունների առաջին փուլը: Ինչպե՞ս կգնահատեք ընտրությունների ընթացքը:
– Ընտրություններն անցան բարձր ժողովրդավարական մակարդակով: Այս ընտրություններին դիտորդական առաքելություն էին իրականացնում տարբեր երկրների դիտորդներ, այդ թվում ԵՄ ներկայացուցիչներ, Եվրախորհրդարանի պատգամավորներ: Բոլորը շատ բարձր գնահատեցին ընտրությունների անցկացման մակարդակը: Ընտրություններն անցկացվեցին 13 շրջաններում, առաջին փուլից հետո 13 թեկնածուներ դարձան խորհրդարանի պատգամավորներ: Աբխազիայի խորհրդարանի պատգամավորներ են ընտրվել 2 հայեր՝ Ռոբերտ Յայլայանը և Վաղարշակ Քյոսյանը: Երկրորդ փուլում Աբխազիայի հերոս Գալուստ Տրապիզոնյանը պայքարելու է լրագրող Լ. Գալուստյանի հետ: Երկու շաբաթից տեղի կունենա կրկնակի քվեարկություն:
– Ինչպե՞ս առաջացավ խորհրդարանի ընտրությունների երկրորդ փուլ անցկացնելու անհրաժեշտությունը:
– Մի շարք ընտրատեղամասերում եղել են 6-ական, 7-ական թեկնածուներ, որոնք չէին կարող անհրաժեշտ ձայները հավաքել առաջին փուլի ընթացքում: Այդ պատճառով այն երկու մարդիկ, ովքեր հավաքել էին ամենաշատ ձայները, տեղափոխվել են երկրորդ փուլ և այդ փուլի ընթացքում ով ունենա ձայների մեծամասնությունը, նա էլ կանցնի խորհրդարան:
– Պարոն Կերսելյան, ինչպիսի՞ն էին հայ համայնքի ակնկալիքներն այս ընտրություններից և այդ սպասումներն արդարացա՞ն, թե՞ ոչ:
– Մենք ցանկանում էինք պահպանել խորհրդարանում մեր ունեցած երեք տեղերը և այդ տեղերը պահպանում ենք, որովհետև այն ընտրատեղամասերում, որտեղ առաջադրված էին հայ թեկնածուները, ոչ ոք չէր խանգարում, հայերը պայքարում էին իրար դեմ: Դա էր պատճառը, որ մենք խորհրդարանում ունեցած մեր երեք տեղերը պահպանեցինք: Ինչ վերաբերում է ռուս թեկնածուներին, նրանք ոչ մի տեղ չպահպանեցին Աբխազիայի խորհրդարանում: Որովհետև հայերը միավորված են բնակվում, իսկ ռուսները սփռված են: Դա էր իրենց պարտության պատճառը:
– Խորհրդարանի ընտրությունների երկրորդ փուլից ի՞նչ սպասելիքներ ունեք:
– Կարող եմ ասել, որ այս ընտրություններն օրինակ էին, թե ինչպես պետք է անցկացնել ընտրություններ: Ընտրությունների թափանցիկությունը, ժողովրդավարությունը բարձր էր: Դրանք անցան հանգիստ, անաղմուկ մթնոլորտում: Հուսով եմ, որ երկրորդ փուլը նույնպես այսպիսին կլինի: Մրցակցությունն ավելի փոքր կլինի, և ամեն բան օրենքի սահմաններում կանցնի: Երկրորդ փուլից հետո արդեն Աբխազիայի խորհրդարանի կազմը ձևավորված կլինի: