Աստղաբան Գուրգեն Հովհաննիսյանը, կանխատեսումներ անելով, թե ինչպիսին է լինելու 2011 թ., նշում է, որ այն շատ բարդ և կտրուկ փոփոխությունների տարի է լինելու. «Բավականին բարդ տարի է սպասվում, քանի որ Սատուրն մոլորակը գտնվում է կշեռքի նշանի մեջ և դեռ երկար այնտեղ կգտնվի, ինչը կազդի տնտեսական և քաղաքական հարցերի վրա: Այն կրիզիսը, որը ունեցել ենք 2008 թ., գրեթե ոչինչ է, եթե համեմատենք սպասվելիք իրադարձությունների հետ»:
Ըստ աստղաբանի, փոփոխություններ տեղի կունենան ֆինանսական և բանկային համակարգերում: Հնարավոր են նաև կտրուկ փոփոխություններ, որոնք շատերը նույնիսկ չեն սպասում. «Փոփոխվում է ողջ երկրագունդը, մտածողությունը, և 2012 թ. հետ կապված իրադարձությունները սրա հեռավոր արձագանքներն են: Հունվարի 20-ից մինչև փետրվարի 19-ը շատ անկանխատեսելի ժամանակահատված է քաղաքական գործիչների, ֆինանսական գործունեությամբ զբաղվողների համար: Այս կանխատեսումները կապված են հաշվարկների և աստղաբանական հիմունքների հետ»:
Աստղաբանը խորհուրդ է տալիս իրավաբանական և հասարակական կազմակերպություններին, արտադրական ֆիրմաներին և կապի մասնագետներին զգոն և աչալուրջ լինել հատկապես փետրվարի 15-ից 28-ն ընկած ժամանակահատվածում, քանի որ շատ բարդ հատված է լինելու. «Մարտ ամսին հնարավոր են տեխնոլոգիական վթարներ, կուժեղանան բնական կատակլիզմները, բանկերը և երկաթգծերը նույնպես կլինեն հարվածի տակ: Ապրիլ ամիսը կազդի դատարանների, կրոնական և ուսումնական հաստատությունների վրա: Բոլոր ամիսներին «մոլորակները» մեր առջև խնդիրներ են դնում, որոնք լուծելով՝ մենք ավելի կուժեղանանք և պատրաստ կլինենք նոր փոփոխություններին»:
