Ադրբեջանում այցով գտվող Բոսնիա-Հերցեգովինայի արտաքին գործերի նախարար Սվեն Ալքալայը հայտարարել է, որ իր երկիրը պաշտպանում է Ադրբեջանի տարածքային ամբոողջականությունը: Այս մասին հաղորդում է APA գործակալությունը:
Նա ասել է նաև, որ Լեռնային Ղարաբաղի հիմնախնդիրը քննարկվել է Բաքվում իր հանդիպումների ժամանակ: «Սա շատ կարևոր հարց է: Բոսնիա-Հերցեգովինայի դիրքորոշումը հստակ է Լեռնային Ղարաբաղի հարցում` մենք պաշտպանում ենք Ադրբեջանի ինքնիշխանությունն ու տարածքային ամբողջականությունն այս հարցում: 2011 թվից Բոսնիա-Հերցեգովինան ՄԱԿ-ի Անվտանգության խորհրդի անդամ է և այս ընթացքում շարունակելու է պաշտպանել Ադրբեջանին ու հետևել այս դիրքորոշմանը»,- հայտարարել է Ալքալայը:
Իհարկե, ՄԱԿ-ի Անվտանգության խորհրդի՝ թեկուզ և ժամանակավոր անդամի աջակցությունն այս հարցում բավականին ուժեղացնում է Ադրբեջանի դիրքերն այդ կազմակերպությունում: Սակայն միաժամանակ պետք է շեշտել, որ այս հայտարարությունը բխում է նաև հենց Բոսնիայի շահերից, քանի որ այդ երկիրը նույնպես փլուզվելու լուրջ վտանգի առաջ է կանգնած և նրա տարբեր մասերը` հատկապես սերբականը, հակասությունների մեջ են կենտրոնական իշխանությունների հետ: