Ինչպես արդեն հայտնել ենք, մարտի 10-ին Ամենայն հայոց կաթողիկոս Գարեգին Երկրորդն ընդունել է Նոր Նախիջևանի և Ռուսաստանի հայոց թեմի թեմական խորհրդի ատենապետ, Ռուսաստանի Դաշնային Ժողովի Դաշնության խորհրդի անդամ Արթուր Չիլինգարովին:
«Ամենայն Հայոց Կաթողիկոսը և Ռուսաստանի հայոց թեմի թեմական խորհրդի ատենապետը գոհունակությամբ հաստատեցին, որ ավարտին է մոտենում Մոսկվայում կառուցվող առաջնորդանիստ եկեղեցու և հսկայական եկեղեցական համալիրի շինարարությունը, որի բացումը ծրագրվում է տարեվերջին: Զրուցակիցները վստահություն հայտնեցին, որ երկար սպասված համալիրի բացումը մեծ նշանակություն կունենա Ռուսաստանի հայ համայնքի կյանքում»,- Մայր Աթոռ Սուրբ Էջմիածնի տեղեկատվական համակարգի տարածած հաղորդագրությունից մեջբերում է անում «Ազատություն» ռադիոկայկանը։
Ինչպես նշում է ռադիոկայանը, վկայակոչելով նույն աղբյուրին, քննարկվել են նաև Հայաստանյայց Առաքելական Եկեղեցու առջև ծառացած զանազան մարտահրավերները ու խնդիրները, անդրադարձ է կատարվել Հայոց Եկեղեցու կարևոր դերակատարությանը՝ Սփյուռքում հայերի ազգային ինքնության պահպանության գործում:
