Բուլգարին և Վալենտինոն խուսափում են հարկերից

Իտալացի հանրահայտ մոդելավորողներ, արվեստի գործիչներ, ոսկերիչներ, ինչպես օրինակ` Վալենտինոն և Ջանի Բուլգարին, կասկածվում են հարկերից խուսափելու, հարկային փաստաթղթեր կեղծելու և իտալական բյուջե պակաս հարկեր վճարելու մեջ: Իտալական լրատվամիջոցների փոխանցմամբ, երկրի դատախազությունն արդեն սկսել է ստուգել Իտալիայի շուրջ 700 քաղաքացու բիզնեսները: Նրանք բոլորն էլ անձնական հաշիվներ են ունեցել բրիտանական HSBC բանկի շվեյցարական բաժնում: Իսկ բանկի հաճախորդների անձնական հաշիվների վերաբերյալ տեղեկատվությունը հայտնի է դարձել այն բանից հետո, երբ դրանք առևանգել էր բանկի նախկին աշխատակից Էրվե Ֆալչանին: Նշենք, որ «Ֆալչանիի ցուցակում» էին հայտնվել Իտալիայի շուրջ 6 հազար քաղաքացու և ընկերությունների մոտ 5,5 մլրդ եվրո կազմող անձնական հաշիվները, որոնք HSBC-ում հաշիվներ են ունեցել 2005-2006թթ. ընթացքում:
Հիշեցնենք, որ սա նորաձևության աշխարհի հայտնի անձանց մասնակցությամբ առաջին հարկային սկանդալը չէ: 2010թ. հոկտեմբերին հաղորդվում էր, որ Միլանի դատախազությունը մեղադրում էր Դոմենիկո Դոլչեին և Ստեֆանո Գաբբանային հարկային հաշվետվությունների կեղծման և իտալական բյուջե մոտ 420 մլն եվրո չվճարելու մեջ:
Նշենք, որ ֆինանսատնտեսական ճգնաժամով պայմանավորված` իտալական կառավարությունը խստացրել է պայքարը հարկեր չվճարողների դեմ, ինչպես նաև չորս տարով սառեցրել բյուջետային աշխատողներին աշխատավարձերի վճարումը, կրճատվել են բարձրաստիճան պաշտոնյաների աշխատավարձերը և պետական համակարգում կատարվող ներդրումները: