Անդրադառնալով ամերիկյան Heritage հիմնադրամի և հեղինակավոր The Wall Street Journal պարբերականի անցկացրած ամենամյա հետազոտության արդյունքներին, համաձայն որոնց` տնտեսական ազատությունների մակարդակով Հայաստանը 2010 թ. մի փոքր բարելավել է դիրքերը նախորդ տարվա համեմատ և այժմ արդեն զբաղեցնում է 36-րդ հորիզոնականը աշխարհի շուրջ 180 երկրների շարքում, տնտեսագետ, «Ժողովրդի իշխանություն» քաղաքացիական նախաձեռնության անդամ Մովսես Արիստակեսյանն ասաց. «2009 թ. համեմատ տնտեսությունն աճել է ընդամենը 2,8 տոկոսով, իսկ դա չի կարող համարվել բարելավում կամ առաջընթաց»: Նա հիշեցրեց, որ աճել է արտագաղթը, գործազրկությունը հասնում է 40 տոկոսի: Մովսես Արիստակեսյանը նկատեց, որ նախորդ տարի նույն հիմնադրամի անցկացրած հետազոտություններով Հայաստանը գտնվում էր 38-րդ տեղում: Նրա դիտարկմամբ` հետազոտություն անցկացնողները ուշադրություն են դարձրել օրենսդրական փոփոխությունների վրա և հենց դրանք էլ համարել բարելավում: Մինչդեռ, ըստ տնտեսագետի, հայտնի է, որ օրենսդրական փոփոխությունները չեն կիրառվում: Սրանից զատ, Մովսես Արիստակեսյանի հավաստմամբ, հիմնադրամն իր հետազոտություններն անցկացնելիս հիմնվել է պաշտոնական վիճակագրական տվյալների վրա, որոնք չեն կարող արժանահավատ լինել: