Ճապոնական Նարայի համալսարանի գիտնականները, որոնք ուսումնասիրում են սարդոստայնի թելերի հատկությունները, այդ թելերից ստեղծել են ջութակի լարեր: Այս մասին հաղորդում է BBC-ն: Գիտնականները անհրաժեշտ նյութը ստացել են` վերցնելով 300 ոսկեմանող սարդերի մանած թելերը:
Նշվում է, որ յուրաքանչյուր լար ստանալու համար օգտագործվել է 3-5 հազար սարդի մանած թել: Գիտնականներն ասել են, որ սարդոստայնի թելերն ավելի ամուր չեն, քան կենդանիների մկաններից պատրաստված լարերը, սակայն ավելի ամուր են, քան արհեստական ալյումինե լարերը: Սարդոստայնի թելերն իդեալական կլոր են, ինչի շնորհիվ դրանք միմյանց միացնելիս ստացվում է իդեալական լար, որի արանքներում չկան ազատ տարածություններ:
Երաժիշտներն արդեն նշել են այս լարերի արձակած ձայնի յուրահատուկ տեմբրը. այն բավականին փափուկ է:
