Միջպետական ավիացիոն կոմիտեի ղեկավար Տատյանա Անոդինան այսօր հայտարարել է, որ Լեհաստանի նախկին նախագահ Լեխ Կաչինսկու օդանավը կործանվել է օդաչուների մեղքով: Նա ասել է, որ օդաչուները չեն ենթարկվել դիսպետչերի հրահանգներին, քանի որ վախեցել են, որ այլ օդանավակայանում վայրէջք կատարելու հրամանը կվրդովի «թիվ մեկ ուղևորին» (Լեհաստանի նախագահին.– 1in.am):
Անոդինան հայտնել է, որ օդաչուների վրա ճնշում է գործադրվել` նշելով, որ վայրէջքի վերջնական որոշում կայացրած ռազմաօդային ուժերի գլխավոր հրամանատար Անջեյ Բլասիկի արյան մեջ հայտնաբերվել է 0,6 պրոմիլե ալկոհոլ, ինչը կարող է օդաչուների կայացրած ոչ ադեկվատ որոշման պատճառ հանդիսանալ:
Ինչպես փոխանցում են լեհական լրատվամիջոցները, իմանալով այս եզրակացության մասին՝ Լեհաստանի վարչապետ Դոնալդ Տուսկը դադարեցրել է կարճատև արձակուրդը և վերադարձել աշխատանքի: Սակայն պաշտոնական Վարշավայի արձագանքն այս զեկույցին դեռ հայտնի չէ: