Կին-տղամարդ մրցակցություն բիզնեսում չպետք է լինի:
Կինը կամ տղամարդը բիզնեսում ունեն նույն խնդիրներն ու նպատակները: «Առաջին լրատվական»-ի հետ զրույցում նման կարծիք հայտնեց Առևտրաարդյունաբերական պալատի նախագահի խորհրդական Լիլյա Գևորգյանը: Նրա խոսքով՝ պարզապես ոլորտներ կան, որոնք կնոջն ավելի մոտ են զարգացնելու, աշխատելու համար:
«Եթե Հայաստանը ռեսուրսներով ավելի հարուստ լիներ, տղամարդիկ ավելի լուրջ զբաղված կլինեին ու թեթև ոլորտները կթողնեին կանանց: Բայց ամեն դեպքում կրթությունը, բժշկությունն ավելի հարմար են կնոջը»,- ասաց Լ. Գևորգյանը:
Նրա գնահատականով՝ անցած տարիներին մեր երկրում շատացել է ընտանեկան բիզնեսը, որը կինն է ղեկավարում, քանի որ ամուսինը պաշտոնյա է կամ այլ զբաղմունք ունի. «Կանանց թիվը կապված է ընդհանուր վիճակի հետ: Ճգնաժամ հասկացությունը նոր նահանջում է, և 2012-ը շատ դժվար տարի կլինի բոլորի համար: Իսկ կանանց թիվը ավելանում է հատկապես սպասարկման ոլորտում»:
