ԱՄՆ-ի և Ռուսաստանի միջև եղած տարաձայնությունները մարդու իրավունքների պաշտպանության և Սիրիայում տիրող իրավիճակի վերաբերյալ չպետք է խոչընդոտեն բնականոն առևտրական հարաբերությունների հաստատմանը, մասնավորապես՝ Ջեքսոն-Վեննիկի ուղղումը չեղյալ հայտարարելուն: Այսպիսի հայտարարություն է արել առևտրի հարցերով ԱՄՆ հատուկ ներկայացուցիչ Ռոն Քիրքը:
Ինչպես հաղորդում է Reuters գործակալությունը, Կոնգրեսի ֆինանսների հարցերով կոմիտեի ներկայացուցիչ, դեմոկրատ Մաքս Բոկուսն իր հերթին նշել է, որ դրա շնորհիվ 5 տարվա ընթացքում ԱՄՆ-ից Ռուսաստան արտահանումը կկրկնապատկվի:
Քանի դեռ ուղղումը հանված չէ, ամերիկյան ընկերությունները անշահավետ պայմաններում են՝ համեմատած եվրոպական կամ չինական մրցակիցների հետ:
Քիրքը հայտարարել է, որ ԱՄՆ-ը նախկինի պես համաձայն չէ Ռուսաստանի հետ մի շարք քաղաքական հարցերում, սակայն դա չպետք է խանգարի երկու երկրների միջև տնտեսական կապերի զարգացմանը:
«Մենք կշարունակենք կոչ անել Ռուսաստանին ուշադրություն դարձնել մարդու իրավունքներին: Սակայն երբ գործը հասնում է ԱՀԿ-ին, մենք անպայման դրան կաջակցենք»,- ասել է Քիրքը:
Ջեքսոն-Վեննիկի ուղղումն ընդունվել է ԱՄՆ-ում 1974 թ. և նախատեսում է սահմանափակել առևտուրը մի շարք երկրների հետ, որոնք արգելում են իրենց քաղաքացիների մուտքը ԱՄՆ: Դա առաջին հերթին վերաբերում էր ԽՍՀՄ-ին: Սահմանափակումներով մասնավորապես նախատեսվում էր հատուկ հարկ սահմանել ԱՄՆ-ից ներմուծվող ապրանքների վրա:
ԽՍՀՄ փլուզումից հետո ԱՄՆ-ը չեղյալ համարեց այդ ուղղումը մի շարք նախկին խորհրդային հանրապետությունների նկատմամբ, սակայն Ռուսաստանի դեպքում մինչ օրս այն գործում է: ԱՄՆ նախագահն ամեն տարի կասեցնում է այն ռուս-ամերիկյան առևտրական հարաբերություններին չվնասելու համար:
