1911թ. այս օրը Բոստոնի Սոմերվիլ արվարձանում (Մասաչուսեթս, ԱՄՆ) ծնվեց ամերիկահայ կոմպոզիտոր Ալան Հովհաննեսը (իսկական անունը` Ալան Հարությունի Չաքմաքչյան):
Հայրը՝ Հարությունը, Ադանայից էր, Բոստոնում էր հաստատվել երկարատև դեգերումներից հետո: Նա բազմաթիվ գրքերի, նաև հայ-անգլերեն առաջին բառարաններից մեկի հեղինակն է, Բոստոնի հայալեզու «Հայրենիք» շաբաթաթերթի երկարամյա գլխավոր խմբագիրը: Մայրը ծագումով շոտլանդացի էր:
Հովհաննեսի առաջին ստեղծագործությունները ծնվել են 4 տարեկանում: 14 տարեկանում, չնայած ծնողների լուրջ դիմադրությանը, գրել է առաջին օպերաները: Նրա երաժշտությունը հասանելի է ունկնդի համար ու օժտված է խորհրդավորությամբ և ինքնահայեցողականությամբ:
Նա համարվում է 20-րդ դարի ամենաբեղուն կոմպոզիտորներից մեկը, նրա պաշտոնական կատալոգում ընդգրկված է 67 համարակալված սիմֆոնիաներ (պահպանված ձեռագրերում սիմֆոնիաների թիվը անցնում է 70-ից) և 434 համարակալած գործ:
«Հովհաննեսը երաժշտություն գրող մեքենա է… Դրանք վերջին 30 տարում երաժշտական ավանդույթներով ստեղծված լավագույն գործերից են ողջ աշխարհում»,- գրել է Նյու Յորքի ֆիլհարմոնիկ նվագախմբի գլխավոր դիրիժոր Անդրե Կոստելյանեցը:
Ամերիկայում նրան անվանում են «կոմպոզիտոր, որ առաջ է կանգնած մյուսներից», Ճապոնիայում և Հնդկաստանում` «որոնող հայ», Անգլիայում` «խաղաղ ամերիկացի»:
Մահացել է 2000թ. հունիսի 21-ին:
