Համաշխարհային բանկի գործադիր տնօրենների խորհուրդը երեկ հաստատել է Հայաստանին աջակցելու ֆինանսական փաթեթ` ուղղված սոցիալապես անապահով խավերի աջակցությանը, մարդկային կապիտալի զարգացմանը խթանելուն, ինչպես նաև երկրի մրցունակության հզորացմանն ու մասնավոր հատվածի զարգացմանը: Այս մասին այսօր տեղի ունեցած ասուլիսի ժամանակ հայտարարեց Համաշխարհային բանկի Հայաստանի գրասենյակի ղեկավար Ժան Միշել Հապին: Ըստ նրա՝ Հայաստանին տրամադրվելու է 25 մլն դոլար վարկ` Զարգացման քաղաքականության գործառնություն (ԶՔԳ), որը երկրորդն է՝ նախատեսված 3 գործառնություններից, որոնք կոչված են սատարելու Հայաստանի կառավարությանը իր ռազմավարական նպատակներին հասնելու գործում: «Համաշխարհային բանկը վճռականորեն է տրամադրված երկարաժամկետ հատվածում այս բոլոր կարևոր օրակարգային ծրագրերի իրականացման ընթացքում Հայաստանի իշխանությունների ջանքերին աջակցելու հարցում, և այս առումով ակնկալվում է, որ մշտական փուլում գտնվող երկրորդ ԶՔԳ-ն կպահպանի հետճգնաժամային մրցունակության և աճի խթանման ուղղվածությունը, ինչպես նաև առողջապահական, կրթական ու սոցիալական ապահովության ցանցի ամրապնդումը»,- ասաց Ժան Միշել Հապին: Նշենք, որ 25 մլն դոլարանոց այս վարկը ներառում է 21 մլն դոլար` Միջազգային զարգացման գործակալությունից և 4 մլն դոլար` Վերակառուցման և զարգացման միջազգային բանկից: Առաջինն ունի 20 տարվա մարման ժամկետ` 10 տարի արտոնյալ ժամկետով, երկրորդը` 25 տարվա մարման ժամկետ` 10 տարի արտոնյալ ժամկետով: