Այսօր գրասենյակն է հարվածի տակ, վաղը` հենց Զեյնալյանը. Մ.Դանիելյան

«Հանրապետություն» կուսակցության գրասենյակ դեկտեմբեր ամսվա ընթացքում արդեն երկրորդ անգամ են անհայտ անձինք ներխուժում, և երկու անգամ էլ անհայտ անձինք տակնուվրա են արել կուսակցության քաղխորհրդի անդամ, իրավապաշտպան Արտակ Զեյնալյանի փաստաթղթերը: Նշենք, որ Հայաստանի Հելսինկյան ասոցացիան և Հելսինկյան քաղաքացիական ասամբլեայի Վանաձորի գրասենյակը հայտարարություն են տարածել ի պաշտպանություն Զեյնալյանի՝ նշելով, որ վերահիշյալ հարձակումները ուղղված են Զեյնալյանի իրավապաշտպան գործունեության դեմ: Հայաստանի Հելսինկյան ասոցացիայի նախագահ Միքայել Դանիելյանը «Առաջին լրատվական»-ի հետ զրույցում նկատեց, որ
Արտակ Զեյնալյանը շատ լուրջ գործունեություն է ծավալել մարտի 1-ի գործերով և լուրջ փաստեր ունի. «Դատախազությունը ամեն ինչ անում է, որ չբացահայտվեն մարտի 1-ի սպանությունները: Զեյնալյանը շատ լուրջ գործունեություն է ծավալել նաև Վահան Խալաֆյանի գործով, և նրա պաշտպանական ճառում ամբողջովին ջարդվում է դատախազության վարկածը: Իմ կարծիքով, իշխանությունները փորձում են խոչընդոտել Արտակի գործունեությունը և տարբեր ձևերով, տարբեր քայլեր են ձեռնարկում, որպեսզի Զեյնալյանի աշխատանքը դժվարանա, ինչու ոչ, նաև ուզում են վախեցնել նրան»:
Դանիելյանը նկատեց, որ եթե այսօր կուսակցության գրասենյակն է հարվածի տակ դրված, վաղը հարվածի տակ կարող է լինել հենց ինքը՝ Զեյնալյանը:
Կուսակցության գրասենյակ ապօրինի մուտք գործելու առիթով հարուցվել է քրեական գործ ՔՕ 177 հոդվածի երկրորդ մասի հատկանիշներով` գողություն, ինչպես նաև նշվում է, որ այստեղ որևէ քաղաքական դրդապատճառ չկա: Միքայել Դանիելյանը նկատեց, որ ոստիկանությունը միշտ էլ բացառում է քաղաքական դրդապատճառը. «Ոստիկանությունը նույն բանն էր ասում թե՛ 2004-ին, թե՛ 2008-ին։ Երբ իշխանական թերթերն էին այս կամ այն իրավապաշտպանի մասին հոդվածներ էին գրում, ոստիկանությունը կրկին ասում էր, թե դա լրագրողի գրելու իրավունքն է, բայց մենք բոլորս էլ գիտենք, որ դա իշխանությունների պատվերն էր»:
Դանիելյանը հիշեցրեց, որ նման հարձակումներ շատ են եղել նաև իր դեմ, և դրանցից ոչ մեկը չի բացահայտվել, չնայած բոլորը գիտեն, թե ով է եղել իրականացնողը: