Հրաժարականի մասին խոսակցությունները երազախաբության արդյունք են

Այսօր լուրեր են տարածվել, թե Կենտրոն վարչական շրջանի ղեկավար Գագիկ Գյանջումյանը հրաժարականի դիմում է ներկայացրել նորանշանակ քաղաքապետ Կարեն Կարպետյանին։ Մենք զրուցեցինք Կենտրոն վարչական շրջանի ղեկավար Գագիկ Գյանջումյանի հետ պարզելու համար՝ իրականությանը համապատասխանո՞ւմ են այդ լուրերը, թե՞ ոչ։ Լսելով մեր հարցը՝ Կենտրոն վարչական շրջանի ղեկավարը անակնկալի եկավ և ասաց. «Մամուլը կարող է՝ քնել է, իմ վրայով երազ է տեսել և այդ երազը ներկայացնում է՝ որպես իրականություն։ Ես էլ կարող եմ ասել, որ տվյալ լրագրողը իր տան տեղը փոխել է»։ Իսկ հարցին, թե ճի՞շտ են այն խոսակցությունները, որ Գագիկ Բեգլարյանի նշանակած կադրերը հերթով հրաժարականի դիմումներ են ներկայացնելու նոր կուսակցություն ստեղծելու համար, պատասխանեց. «Նաև ասում են, որ տվյալ լրագրողը, բացի այն, որ իր տունն է ուզում փոխել, նաև պատրաստվում է ամուսնալուծվել։ Ես փորձեցի կոպիտ դիտարկման միջոցով օրինակ բերել և հավատացնել, որ նման բան չկա»,- եզրափակեց Գագիկ Գյանջումյանը։ Ի դեպ, նկատենք, որ այսօր հրաժարականի դիմումների շարքում նշվում էր նաև Շենգավիթ վարչական շրջանի ղեկավար Սարգիս Հովհաննիսյանի անունը։