Երևանի քաղաքապետ Տարոն Մարգարյանը ներկա է գտնվել քաղաքապետարանի ենթակայության Ժամանակակից արվեստի թանգարանում կայացած Հենրիկ Իգիթյանի 80-ամյա հոբելյանին նվիրված «Հայաստանի ժամանակակից արվեստի թանգարանը» գրքի շնորհանդեսին:
Ռուսերեն և անգլերեն տարբերակներով հրատարակված գիրք-ալբոմում ներկայացված են թանգարանի հիմնադրման պատմությունը, ինչպես նաև 20-րդ դարի երկրորդ կեսի ամենահայտնի նկարիչների ու քանդակագործների թանգարանում ցուցադրվող և արվեստասերներին դեռևս անհայտ աշխատանքներ:
Շնորհանդեսի շրջանակում հյուրերը դիտել են նաև Հենրիկ Իգիթյանի մասին պատմող «Արվեստակիրներ» փաստավավերագրական տեսաֆիլմը, որը ստեղծվել է արվեստագետի վերջին հարցազրույցի հիման վրա, որով էլ ամբողջացվում է Հենրիկ Իգիթյան մարդու, արվեստագետի և քաղաքացու կերպարը:
Արվեստագետի եղբայր, ճարտարապետ Լևոն Իգիթյանը, կարևորելով թանգարանի դերն ու նշանակությունը հայկական մշակութային ժառանգության մեջ, հատուկ շնորհակալություն է հայտնել քաղաքապետ Տարոն Մարգարյանին` 2011 թվականի տարեվերջին թանգարանի ջեռուցման անհատական համակարգի տեղադրման և արվեստի գործերի փրկության համար:
Երևանի քաղաքապետարանի տեղեկատվության և հասարակայնության հետ կապերի վարչությունից «Առաջին լրատվական»-ին տեղեկացնում են, որ միջոցառմանը ներկա են գտնվել նաև ՀՀ Ազգային ժողովի նախագահ Սամվել Նիկոյանը, ՀՀ Մշակույթի նախարար Հասմիկ Պողոսյանը, ինչպես նաև Հենրիկ Իգիթյանի ընկերներն ու նրա աշխատանքը գնահատող այլ արվեստագետներ:
