Ստավրոպոլի մարզային դատարան էր ուղարկվել Պյատիգորսկի բնակիչ Ալեքսեյ Շատալովի և Ստավրոպոլի մարզի Ներքին գործերի գլխավոր վարչության Կազմակերպված հանցավորության դեմ պայքարի բաժնի նախկին պետ Վլադիմիր Մոխոնչենկոյի գործը: Նախաքննության տվյալներով, նրանք եղել են այսպես ասած` Պոպովի բանդայի անդամներ: Այս հանցավոր խմբավորումը ձևավորվել է 2000 թվականից` մասնագիտացել պաշտոնատար անձանց, բիզնեսմենների պատվիրված սպանությունների մեջ և տարբերվել առանձնակի դաժանությամբ: Այդ երկու անձինք այժմ մեղադրվում են բանդիտիզմի, սպանության, զենքի ապօրինի շրջանառության, իսկ փոխգնդապետը նաև պաշտոնեական դիրքը չարաշահելու մեջ: Ինչպես հայտնել են գլխավոր դատախազությունում, մեղադրյալ Ալեքսեյ Շատալովը Վալերի Պոպովի բանդայի կազմում և վերջինիս ղեկավարությամբ անձամբ իրականացրել է չորս սպանություն:
Հանցագործությունները կատարվել են հիմնականում 2005-2006թթ-երին: Եվս մեկ սպանություն բանդան չի կարողացել իրականացնել, քանի որ ուժայինները հասցրել են ձերբակալել բանդայի մի շարք անդամների` նրանց պարագլուխ Վալերի Պոպովի հետ միասին: Ձերբակալման ժամանակ, Շատալովը դիմադրություն էր ցույց տվել իրավապահներին, ինչի արդյունքում էլ հրազենային վիրավորում էր ստացել և տեղափոխվել Պյատիգորսկի թիվ 1 քաղաքային հիվանդանոց, որտեղից էլ փախուստի էր դիմել: Արդյունքում, նրա հիվանդասենյակի մոտ հսկող երկու ծառայողներին դատարանը մեղավոր էր ճանաչել ծառայողական անփութության մեջ և դատապարտել ազատազրկման: Շատալովի նկատմամբ հետախուզում էր հայտարարվել:
Երկար ժամանակ միջազգային հետախուզման մեջ էր գտնվում նաև Վլադիմիր Մոխոնչենկոն: Նախաքննության ընթացքում պարզվել էր, որ Մոխոնչենկոն, զբաղեցնելով ՆԳ մարզային գլխավոր վարչության Կոռուպցիայի և կազմակերպված հանցախմբերի դեմ պայքարի բաժնի պետի պաշտոնը, օժանդակել է բանդայի անդամների կատարած սպանությունների հետքերը թաքցնելուն և միջոցներ ձեռնարկել դրանց չբացահայտման համար` չարաշահելով իր պաշտոնեական դիրքը: Մեղադրական եզրակացությունից երևում է, որ հենց փոխգնդապետն է որոշել, որ պետք է լիկվիդացնել տեղի հանցավոր խմբավորումներից մեկի անդամ Վլադիմիր Մուրաշկոյին /Վոլոդյա Պուխլին/ այն բանի համար, որ վերջինիս դիակի զննության ժամանակ հայտնաբերվեն ավելի վաղ սպանված օրենքով գող «Էրիկ Աշխաբադսկիի» /Էրիկ Ենոքի Սաղաթելյանի/ անձնական իրերը, ինչպես նաև հրազենն ու դանակը, որոնք գործածվել էին քրեական առաջնորդին սպանելիս: Ավելի վաղ, քննիչները կարծում էին, որ հենց Վլադիմիր Մոխոնչենկոն է Դոմբայ գյուղում մասնակցել Էրիկ Աշխաբադսկու ձերբակալմանը, ում հետո հանձնել է Պոպովի բանդայի անդամներին: Վերջիններս դանակներով մասնատել էին օրենքով գողին, գլխին ստուգիչ կրակոց արձակել, իսկ դիակը նետել էին Մառա գետի կիրճը, որը գտնվում է Կարաչևո-Չերկեսիայի տարածքում: Իսկ Մուրաշկոյի սպանությունը կեղծ հետքերով էր ուղղորդվել:
2009թ.-ին բանդայի ինը անդամների, այդ թվում նաև պարագլուխ Վալերի Պոպովի գործը հանձնվել էր դատարան: Նրանց էր վերագրվում մի քանի տասնյակ պատվիրված սպանություններ` կատարված Ստավրոպոլի մարզում և Կարաչևո-Չերկեսիայում: Նախաքննության տվյալներով, Պոպովի բանդայի քիլլերների զոհ էին դարձել«Լյուդմիլա» և «Պրեդգորե» շուկաների տնօրեններ Յուրի Տիմոշենկոն և Իգոր Անդրևևը: 2004 թվականին հանցախմբի անդամները սպանել էին Պյատիգորսկի «Էկոն» հրուշակեղենի ֆաբրիկայի տնօրեն Անատոլի Պլյուշենկոյին: Երկրորդ մահափորձի արդյունքում նրանք լիկվիդացրել էին «Ստավրոպոլգազսնաբ»-ի գլխավոր տնօրեն Էդուարդ Աղաջանյանին, ընդ որում պատահական զոհ էր դարձել նաև Ստավրոպոլի քաղաքային դումայի պատգամավոր Օլեգ Կազնաչեևը: 2004-ի սեպտեմբերին պոպովցիները մահափորձ էին կատարել 2011-ի հունվարին սպանված Վլադիմիր Սլիզաևի /Խան/ նկատմամբ: Իսկ 2005-ին նրանք սպանել էին Սատվրոպոլի նահանգապետի խորհրդական Յուրի Պրաչովին, ում հետ մահացել էր նաև ՆԳ գլխավոր վարչության մայոր Յուրի Շվեդովը: Բացի դա, 2005-2006թթ. բանդան մոտ 30 ավազակային հարձակում էր իրականացրել բիզնեսմենների և ֆիրմաների վրա: Դատավճռով բանդայի անդամները տարբեր պատժաչափեր են վաստակել, իսկ Վլադիմիր Պոպովը և նրա անմիջական ենթակա Վալերի Բուդկոն դատապարտվել են ցմահ ազատազրկման
