ԵԱՀԿ-ի պաշտոնական կայքի փոխանցմամբ՝ ԵԱՀԿ Մինսկի խմբի համանախագահները հայտարարություն են տարածել, որում ամփոփել են իրենց տարածաշրջանային այցի արդյունքները.
«ԵԱՀԿ Մինսկի խմբի համանախագահներ Ռոբերտ Բրադտկեն (ԱՄՆ), Իգոր Պոպովը (Ռուսաստան), Ժակ Ֆորը (Ֆրանսիա) և ԵԱՀԿ գործող նախագահի անձնական ներկայացուցիչ Անջեյ Կասպրշչիկը մարտի 2-6-ին այցելել են Երևան, Լեռնային Ղարաբաղ և Բաքու: Համանախագահները հանդիպումներ են ունեցել նախագահներ Սերժ Սարգսյանի ու Իլհամ Ալիևի և Լեռնային Ղարաբաղի դե-ֆակտո իշխանությունների հետ:
Համանախագահները կողմերին ներկայացրել են հունվարի 23-ին Սոչիում Մեդվեդևի, Սարգսյանի ու Ալիևի կողմից արված համատեղ հայտարարության իրագործման պլանը: Հենվելով «հիմնարար սկզբունքների» համաձայնեցումն արագացնելու պատրաստակամության վերաբերյալ երկու երկրների նախագահների արած հայտարարության վրա՝ համանախագահները կողմերին առաջարկներ են արել՝ կապված համապարփակ խաղաղության համաձայնագրի վրա աշխատանքների շարունակման հետ:
Համանախագահները նաև քննարկել են շփման գծում գրանցվող միջադեպերի հետաքննման մեխանիզմների վրա տարվող աշխատանքների վերաբերյալ Սոչիի հայտարարությամբ նախատեսված պարտավորությունների կատարումը: Դրա հետ մեկտեղ քննարկվել է նաև ժողովուրդների միջև հումանիտար հարաբերություններն ու կապերը, որոնք չպետք է քաղաքականացվեն ի վնաս բանակցային գործընթացի, և որոնք պետք է ծառայեն տարածաշրջանի ժողովուրդների միջև փոխըմբռնման կայացմանը:
Համանախագահները պլանավորել են մարտի 22-ին մեկնել Վիեննա՝ հակամարտության խաղաղ կարգավորման ուղղությամբ ձեռնարկված վերջին քայլերի մասին ԵԱՀԿ Մշտական խորհրդին իրազեկելու համար»:
