Պրահայում երկուշաբթի Վիշեհրադյան քառյակի և Եվրամիության Արևելյան գործընկերության ծրագրում ընդգրկված երկրների արտգործնախարարների հանդիպումը արդյունավետ է եղել։ Ինչպես տեղեկացնում է «Ազատություն» ռադիոկայանը, այս գնահատականի հետ հանդիպումից հետո կայացած ասուլիսի ընթացքում համաձայնել են թե՛ Եվրամիության պաշտոնյաները, թե՛ բանակցությունների մասնակից երկրների արտգործնախարարները:
Եվրամիության ընդլայնման հարցերով հանձնակատար Շտեֆան Ֆյուլեն ռադիոկայանի հետ զրույցում ասել է, որ թեև հանդիպման ընթացքում ղարաբաղյան խնդրին հատուկ անդրադարձ չի կատարվել, սակայն չլուծված հակամարտությունների հարցը քննարկվել է։
«Մենք հարցը քննարկել ենք ընդհանուր գծերով, այն առումով, որ Եվրամիությունը հավակնում է ավելի ակտիվ դերակատարություն ունենալ այնպիսի հակամարտությունների լուծման հարցում, ինչպիսին ղարաբաղյան հակամարտությունն է», ասել է հանձնակատարը։
Հարցին` ինչպե՞ս է պատրաստվում Եվրամիությունն ընդլայնել իր դերակատարությունը Լեռնային Ղարաբաղի հակամարտության լուծման գործընթացում, Շտեֆան Ֆյուլեն պատասխանել է. – «Առաջին հերթին, իհարկե, դա Արևելյան գործընկերության ծրագիրը խթանելն է։ Այն, փաստորեն, ընդգրկում է նաև ղարաբաղյան հակամարտության մեջ ներգրավված երկրները և այդ առումով հնարավորություն է տալիս այդ երկրներին համագործակցությունն ամրացնելու նոր ուղիներ գտնել և նոր դռներ բացել: Երկրորդ` պետք է վստահությունն ամրապնդող միջոցառումներ ձեռնարկել, և երրորդ` մենք հստակ հայտարարարել ենք, որ պատրաստ ենք մաս կազմել համակողմանի և լիակատար հանգուցալուծմանը, ինչպիսին էլ այն լինի` իհարկե, հիմնված կողմերի համաձայնության վրա»:
Անդրադառնալով Հայաստանում մայիսին անցկացվելիք ընտրություններին` Ֆյուլեն ասաց. – «Այժմ, իհարկե, կարևոր է, որ Հայաստանը սպասվող խորհրդարանական ընտրություններում ապացուցի, որ կարող է անցկացնել ազատ և արդար ընտրություններ։ Այս հանդիպման ընթացքում հարցը հստակ դրվել է, և ոչ միայն Հայաստանի առջև: Ընտրությունների շեմին են այլ գործընկեր պետություններ ևս, և այս առումով շեշտվել է, որ եթե ուզում եք մեզնից ավելի մեծ աջակցություն ստանալ, պետք է ավելին անեք, և ազատ և արդար ընտրություններ անցկացնելը հիմնական կետերից է»:
Հունգարիայի արտգործնախարար Յանոշ Մարտոնին, ասուլիսի ընթացքում խոսելով Արևելյան գործընկերության ծրագրի մասին, հարկ է համարել շեշտել, որ այժմ արդեն հավասարակշռություն է նկատվում Եվրամիության արտաքին քաղաքականության երկու ուղղությունների` Արևելյան և Հարավային գործընկերության ծրագրերի միջև: Այսինքն, արևելյան հարևանները` հարավկովկասյան երեք երկրները, Ուկրաինան, Բելառուսն ու Մոլդովան, Եվրամիության համար այժմ նույնքան կարևորություն են ներկայացնում, որքան հարավային գործընկերները` դրանք միջերկրածովյան արաբական պետություններն են, Իսրայելը և Պաղեստինը։
«Այժմ հստակ հավասարակշռություն կա Արևելյան և Հարավային գործընկերությունների միջև, և Եվրամիությունը շահագրգռված է առաջընթաց ունենալ երկու ուղղությամբ էլ` չմոռանալով նաև արևմտյան բալկանյան երկրները, որտեղ իրավիճակն այլ է»,- ասել է Հունգարիայի արտգործնախարարը։
«Մենք աջակցում ենք Արևելյան գործընկերության երկրների եվրոպական ձգտումներին, համենայն դեպս` նրանց, որոնք իրական և լուրջ ջանքեր են գործադրում այդ ուղղությամբ: Մենք բոլորս գիտենք, որ իրավիճակը գործընկեր երկրներում նույնը չէ, և գործընթացներն էլ տարբեր երկրներում տարբեր ժամկետներ են պահանջում, սակայն, կարծում եմ, կրկին պետք է ընդգծել, որ դրված խնդիրները նույնն են, վերջնական քաղաքական նպատակները` ևս», – հայտարարել է Յանոշ Մարտոնին։
