Փորձագետ Մանվել Սարգսյանը կարծում է, որ Հայաստանի հանդեպ ՌԴ նորընտիր նախագահ Վլադիմիր Պուտինի ընտրած հնարավոր քաղաքական կուրսը էական փոփոխություններ չի կրի: Այս մասին նա ասաց «Առաջին լրատվական»-ի հետ զրույցում:
«Նախ պետք է պարզել՝ ինչ է նշանակում այս վերադարձը հենց Պուտինի համար, որքանով է ստեղծված նոր իրավիճակը համապատասխանում նրա քաղաքականության էությանը: Կարծում եմ՝ Պուտինն ինքն էլ լավ չի պատկերացնում դա, որովհետև անգամ այս ընտրությունները ցույց են տալիս, որ Ռուսաստանում իրավիճակը փոխվել է, և նախագահ ընտրվելն արդեն այնքան հեշտ չէ, որքան 10-15 տարի առաջ: ՌԴ նոր նախագահը պետք է որոշումներ ընդունի՝ մնալ նո՞ւյնը, շարունակել տարիներ շարունակ ունեցած մոտեցումնե՞րը, թե՞ ձևափոխել դրանք: Չեմ կարծում, որ նա ցանկություն ունենա փոխվելու, խոսելու ժողովրդի հետ: Պուտինը, միաժամանակ, հասկացել է, որ որպես «ազգի պապա» հնարավոր չէ իշխել և ինքն այսուհետ պետք է մարդկանց հետ խոսի, խնդրի, համոզի որպես նախագահի թեկնածու»,- ասաց փորձագետը:
Անդրադառնալով հետխորհրդային երկրների, մասնավորապես Հայաստանի հանդեպ Վլադիմիր Պուտինի ընտրած հնարավոր քաղաքական կուրսին՝ Մանվել Սարգսյանը նկատեց, որ էական փոփոխություններ այդ ոլորտում դժվար գրանցվեն: «Եթե անգամ կուրսի փոփոխություն լինի, դա դեռ չի նշանակում՝ ռուսական ընդհանուր քաղաքականությունը փոխվել է: Սա, ինքնին, բավականին դժվար բան է: Համենայնդեպս, չեմ տեսնում, որ Ռուսաստանը նման ցանկություն ունի»,- ասաց նա:
Պատասխանելով հարցին՝ հնարավոր համարո՞ւմ է, որ Վլադիմիր Պուտինը համեմատաբար հանդուրժող գտնվի Հարավային Կովկասի տարածաշրջանում և հատկապես Հայաստանում Արևմուտքի չափավոր ներկայությանը, փորձագետը նկատեց. «Դա մեծապես կախված է նրանից, թե Ռուսաստանն Արևմուտքի հանդեպ ինչ քաղաքականություն է որդեգրելու: Վերոնշյալը կախված է Արևմուտքի հետ ՌԴ հարաբերությունների որակից»:
Նշենք, որ նախագահական ընտրությունները Ռուսաստանում կայացան երեկ՝ մարտի 4-ին: Ըստ ձայների նախնական հաշվարկի՝ Վլադիմիր Պուտինն ավելի քան 63 տոկոսով դառնում է ՌԴ նոր նախագահ: