Դեկտեմբերի վերջին լրացել է Վրաստանում լույս տեսնող «Վրաստան» հայալեզու թերթի 90-ամյա հոբելյանը: Ինչպես տեղեկացնում են «Առաջին լրատվականի» աղբյուրները Թբիլիսիից` այս առիթով թերթի վրացաբնակ ընթերցողներին շնորհավորական ուղերձներ են հղել` Վրաստանի նախագահ Միխեիլ Սաակաշվիլին, խորհրդարանի նախագահ Դավիթ Բակրաձեն:
Վրաստանի նախագահը մասնավորապես իր շնորհահավորական ուղերձում նշել է. «Բարեկամական հարաբերությունները հպարտություն են այնպիսի փոքր երկրների համար, ինչպիսիք են Հայաստանն ու Վրաստանը, և «Վրաստանի» գրեթե մեկդարյա գոյության գաղտնիքը, նրա այժմեականության ակունքները սկիզբ են առնում հենց այդ բարեկամությունից: Ձեր թերթը միշտ արժանապատվորեն ծառայել է ժողովուրդների միջև բարիդրացիության ամրապնդման պատվավոր առաքելությանը»: Այնուհետև Վրաստանի նախագահը շարունակել է. «Մեր ժողովուրդների պատմական մեծ փորձից գիտենք, որ մեր հարաբերությունների կայունությունը ոչինչ չի թուլացնի և, ինչպես միշտ, վերստին ուս-ուսի կշարունակենք մեր ճանապարհը»:
Վրաստանի խորհրդարանի նախագահ Դավիթ Բակրաձեն իր և խորհրդարանի կողմից հղված շնորհավորական ուղերձում նկատել է. «Առանձնապես է կարևորվում այն նշանակալից դերակատարությունը, որ ստանձնել է ձեր թերթը վրաց և հայ ժողովուրդների բազմադարյան բարեկամությունն ամրապնդելու ուղղությամբ: Միաժամանակ, խորապես մեծ է նաև ձեր թերթի վաստակը Վրաստանի էթնիկապես հայ քաղաքացիներին հասարակական մեր համընդհանուր կյանք լիարժեք ինտեգրելու գործում»:
«Վրաստան» հայալեզու թերթի 90-ամյա հոբելյանը շնորհավորել են նաև` Սերժ Սարգսյանը, Ամենայն Հայոց Կաթողիկոս Գարեգին Երկրորդը, Վրաստանի խորհրդարանի պատգամավոր Հենզել Մկոյանը, Վրաստանում Հայաստանի Հանրապետության արտակարգ և լիազոր դեսպան Հրաչ Սիլվանյանը, Վիրահայոց թեմի առաջնորդ Տեր Վազգեն եպիսկոպոս Միրզախանյանը: