Ակնհայտ է, որ Հայոց ցեղասպանության քրեականացման մասին օրինագիծը ֆրանսիական ներքին քաղաքականության մաս է դարձել: Այսօր կայացած մամուլի ասուլիսի ժամանակ այս մասին ասաց Կովկաս ինստիտուտի տնօրեն, քաղաքագետ Ալեքսանդր Իսկանդարյանը:
«Ամեն բան ստացվեց այնպես, ինչպես ստացվեց, այսինքն` հայկական օրինագիծը մերժվեց, ինչը նշանակում է, որ Ֆրանսիայում կան այս օրինագծի ընդունմանը դեմ քաղաքական ուժեր:
Միաժամանակ, պետք է կրկնել, որ հարցը ոչ այնքան հայկական, որքան ֆրանսիական կողմին էր վերաբերում: Ինձ թվում է` իրավիճակը փոխել հնարավոր չէ: Մինչև Ֆրանսիայի նախագահական ընտրությունները բարձրագոչ հայտարարություններ հնարավոր են, գործողություններ` դժվար»,- նկատեց Իսկանդարյանը:
Անդրադառնալով երեկ` մարտի 4-ին Ռուսաստանում տեղի ունեցած նախագահական ընտրություններին` նա նշեց, որ նախնական արդյունքները խիստ հետաքրքրական էին:
«Ես շուրջ 10 տոկոսով սխալ էի հաշվարկել Վլադիմիր Պուտինի ձայները` մոտ 50 տոկոս, այնինչ նա 60 տոկոսից ավելի է հավաքում: Իսկ ահա արտասվող Պուտինը լրիվ ուրիշ պատմություն էր:
Ամեն դեպքում, ինձ թվում է`չեն լինի հեղափոխական գործողություններ, բայց իրավիճակը կտրուկ փոխվում է: Ռուսաստանում նոր իրավիճակ է ստեղծվում. մենք գործ ենք ունենալու այլ` նոր Ռուսաստանի հետ. քաղաքական բոլորովին այլ պատկեր են ներկայացնելու թույլ լեգիտիմություն ունեցող ավտորիտար առաջնորդը և ուժեղ լեգիտիմություն ունեցող ավտորիտար նախագահը:
Իհարկե, անպայման կգտնվեն մարդիկ, ովքեր չեն ընդունի նախագահական ընտրությունների արդյունքները, անպայման կլինեն հանրահավաքներ, և հետաքրքիր է` ինչպե՞ս այս ամենին կարձագանքի իշխանությունը` կզսպի՞ ցույցերը, թե՞ ոչ: Սրանք դեռ ծաղիկներն են, պտուղները կլինեն ավելի ուշ, և այլ ելք չկա, քան բարեփոխումներ իրականացնելը: Երբ տնտեսական խնդիրներ ծագեն, բողոքը Ռուսաստանում բոլորովին ուրիշ բնույթ կստանա»,- ասաց քաղաքագետը:
Ամփոփելով` Կովկաս ինստիտուտի տնօրենը նշեց, որ Պուտինի՝ նախագահ ընտրվելը ոչ մի ուղիղ ազդեցություն չի ունենա Հայաստանում կայանալիք ԱԺ ընտրությունների վրա:
«Իսկ ընդհանրապես, Հայաստանի քաղաքական իրավիճակի վրա նրա ընտրությունն անպայման ազդեցություն կունենա: Ինչ վերաբերում է ԼՂ հակամարտությանը, ապա այս հարցում Վլադիմիր Պուտինի նախագահության օրոք չեմ կարծում՝ որևէ բան փոխվի»,- ասաց Իսկանդարյանը: