«Ա1+»-ի փոքրիկ հաղթանակը

11 Հունվար, 2011 18:54

Դիտումներ՝ *

Անցյալ տարի` դեկտեմբերի 16-ին, Հեռուստատեսության և ռադիոյի ազգային հանձնաժողովի` կապուղիների հայտարարած մրցույթում «Արմնյուզ» հեռուստաընկերությանը «պարտվելուց» հետո «Ա1+» հեռուստաընկերությունը հայց էր ներկայացրել Վարչական դատարան` ընդդեմ ՀՌԱՀ-ի: Բանն այն է, որ «Ա1+» հեռուստաընկերությունը թվայնացման մրցույթի ավարտից և արդյունքների հրապարակումից հետո ՀՌԱՀ-ից պահանջել էր տրամադրել «Արմնյուզ» և «Արմենիա» հեռուստաընկերությունների մրցութային առաջարկների կրկնօրինակները: Սակայն հանձնաժողովը հրաժարվել էր դրանք տրամադրելուց` պատճառաբանելով, թե աշխատում են դրանց վրա և կարող են միայն հունվարի 20-ից հետո տրամադրել: «Ա1+»-ը Վարչական դատարանին միջնորդել էր պարտավորեցնել ՀՌԱՀ-ին կատարել օրենքով իրեն վերապահված պարտավորությունները, և մրցույթի թափանցիկություն ու հավասար պայմաններ ապահովելու պարտավորության շրջանակում տրամադրել երկու հեռուստաընկերությունների մրցութային առաջարկների պատճենները: Այսօր դատավոր Քրիստինե Մկոյանը, հիմք ընդունելով կողմերի տեսակետները, դատավարությունը հետաձգեց մինչև հունվարի 20-ը, որի ժամանակ ՀՌԱՀ-ը պետք է դատարան ներկայանա «Արմնյուզի» և «Արմենիայի» մրցութային փաթեթներով: «Ա1+»-ի փաստաբան Ալեքսանդր Սահակյանն այդ դատավարությունը գնահատել է որպես փոքրիկ հաղթանակ` հեռուստաընկերության ոտնահարված իրավունքները վերականգնելու ճանապարհին: