Ադրբեջանական կողմի պահանջին՝ Գաբալայի ռադիոտեղորոշիչ կայանի վարձավճարը տարեկան 7 մլն դոլարի փոխարեն հասցնել 300 միլիոնի, Ռուսաստանը կարող է համաձայնել կամ չհամաձայնել՝ կախված մի շարք հանգամանքներից. տվյալ կայանի բացարձակ անհրաժեշտությունից, երկկողմ հարաբերություններից և ֆինանսական նպատակահարմարությունից: «Առաջին լրատվական»-ի հետ զրույցում ասաց քաղաքագետ Ալեքսանդր Մարկարովը:
«Ռուսաստանն իր համար պետք է որոշի՝ արդյո՞ք Գաբալան այն գերակայությունն է, որի բացակայությունը կարող է ազդել երկրի ռազմավարական հարաբերությունների վրա: Ես չգիտեմ՝ բացի Գաբալայից, Ռուսաստանն ունի՞ արդյոք այլ համապատասխան կառույցներ՝ հետևելու ռադիոտեղորոշիչ այդ կայանի կողմից վերահսկվող հոսքերին: Մյուս հարցն այն է՝ Գաբալան ռազմակա՞ն, թե՞ քաղաքական գործոն է: Բնականաբար, կարևոր է նաև խնդրի ֆինանսական կողմը»,- ասաց քաղաքագետը:
Հարցին՝ ճիշտ չի՞ լինի, որ ռուսական ռազմաբազան այստեղ պահելու համար Հայաստանը ևս տարեկան վարձավճար պահանջի Ռուսաստանից, Մարկարովն ասաց. «Խնդիրը ներառում է ոչ թե վարձավճարի սահմանումը, այլ արդեն իսկ ստորագրված ու գործող պայմանագրի վերանայումը: Եթե Ադրբեջանը Գաբալայի համար ավել վարձավճար է պահանջում, դա դեռ չի նշանակում, որ մենք էլ մեր հերթին պետք է պահանջենք: Հայ-ռուսական հարաբերությունների որակից և անհրաժեշտությունից ելնելով՝ տրամաբանական չի լինի բարձրացնել վարձավճարի հարցը»,- ամփոփեց քաղաքագետը:
Նշենք, որ ըստ մոսկովյան «Կոմերսանտի»՝ Ադրբեջանն անսպասելի պահանջ է ներկայացրել` ավելի քան 40 անգամ ավելացնել ռազմական այս օբյեկտի օգտագործման տարեկան վարձավճարը: Եթե անցած տասնամյակում Ռուսաստանը տարեկան 7 միլիոն դոլար էր վճարում, ապա այժմ ադրբեջանական կողմը պատրաստվում է տարեկան վարձավճարը դարձնել 300 միլիոն: Այս պահանջին չընդառաջելու դեպքում պաշտոնական Բաքուն սպառնացել է չերկարաձգել Գաբալայի կայանի վարձակալության պայմանագիրը, որի ժամկետն արդեն իսկ մոտենում է ավարտին:
«Կոմերսանտի» փոխանցմամբ` Բաքուն իր այս պահանջը հնչեցրել է փետրվարի կեսերին կայացած բանակցությունների ժամանակ: Ուշագրավ է, որ անցած տարվա աշնանը Ադրբեջանի կառավարությունը պահանջել էր կրկնապատկել Գաբալայի վարձավճարը` այն հասցնելով 15 միլիոնի: