ՀՀ նախագահին առընթեր Սևանի հանձնաժողովը պետք է հրաժարվի լճի մակարդակի բարձրացման գրաֆիկից: «Առաջին լրատվական»-ի հետ զրույցում նման տեսակետ հայտնեց Հայաստանի Կանաչների միության նախագահ, ՀՀ նախագահին առընթեր Սևանի հանձնաժողովի անդամ Հակոբ Սանասարյանը` հավելելով, որ Սևանա լճում աշխատանքներ իրականացնելուց առաջ պետք է կարգավորվի այս հարցը: Նշենք, որ այդ գրաֆիկի համաձայն՝ Սևանա լճի մակարդակը տարեկան պետք է բարձրանա 20 սմ:
Հ. Սանասարյանի կարծիքով` նախագահական հանձնաժողովը առաջին հերթին պետք է հրաժարվի այն գրաֆիկից, որը հաստատվել է. մակարդակի բարձրացում տարեկան 20 սանտիմետրով: «Այս դեպքում ամեն բան իր տեղը կընկնի, քանի որ այդ 20 սմ գրաֆիկը որևէ կերպ հիմնավորված չէ: Այս խնդրի լուծումից հետո կարելի է մնացած հարցերի մասին խոսել: Այդ գրաֆիկը հորինված, հիմք չունեցող գրաֆիկ է, իբրև թե դա ճիշտ հաշվարկված է: Ես՝ որպես այդ հանձնաժողովի անդամ գտնում եմ, որ իրականությանը մոտ չէ, և դա պետք է փոխվի»,- մեկնաբանեց Հ. Սանասարյանը`հավելելով, որ իր առաջարկները ներկայացրել է հանձնաժողովին և արդյունքների մասին կխոսի ավելի ուշ:
Հիշեցնենք, որ ՀՀ նախագահին առընթեր Սևանի հանձնաժողովի նախագահ Վլադիմիր Մովսիսյանը հայտարարել էր, որ Սևանա լճի մակարդակը 1900 մետր է, սակայն դա միայն Սևանում աշխատանքներ իրականացնելու սկիզբ կարելի է համարել:
