Լյուդմիլա Սարգսյանը ողջունում է

Հայ ազգային կոնգրեսի անդամ, ԱԺ նախկին փոխնախագահ Կարապետ Ռուբինյանը Facebook սոցիալական ցանցում տարածել է հայտարարություն, որում ի մասնավորի նշում է. «Նախաձեռնում եմ առցանց ազատականների ալյանս (այսուհետ 3 Ա), որը հայ իրականության մեջ առաջին փորձն է՝ համացանցի միջոցով միավորելու Հայաստանի, Արցախի ու Սփյուռքի ազատականներին և նրանց համատեղ առցանց գործունեությունը ծառայեցնելու ի շահ մեր երկրի ու ժողովրդի: 3 Ա-ում միասին փորձելու ենք ոչ միայն քաղաքական գործունեության նոր ձևեր կիրառել, այլև հիմնել ազատականության ու ժողովրդավարության՝ հայ հասարակության համար նոր ավանդույթներ, այն է` գործունեության լիակատար թափանցիկություն, ֆինանսական լիակատար անկախություն, անդամների լիակատար հավասարություն, ներքին կառավարման խորը ժողովրդավարացում ու ղեկավար մարմինների հաճախակի, մրցակցային ընտրություններ»: «Առաջին լրատվականը» Հայ ազգային կոնգրեսին մաս կազմող Սոցիալ-դեմոկրատ հնչակյան կուսակցության նախագահ Լյուդմիլա Սարգսյանից հետաքրքրվեց, թե Կարապետ Ռուբինյանի այդ նոր նախաձեռնությունը չի՞ լինի Հայ ազգային կոնգրեսին այլընտրանք, և դա չի՞ նշանակում, որ ՀԱԿ-ից կա որոշակի դժգոհություն: Լյուդմիլա Սարգսյանը մեր զրույցում նշեց, որ չի կարծում, թե Կարապետ Ռուբինյանի այդ քայլը կապված է ՀԱԿ-ից դժգոհ լինելու հետ: Նա ողջունեց ԱԺ նախկին փոխնախագահի նախաձեռնությունը` ասելով, որ որքան շատ լինեն նման նախաձեռնություններ, այնքան դրանք կնպաստեն մեր ներքին խնդիրների լուծմանը: Տիկին Սարգսյանն ասաց, որ թեև ինքը սոցիալիստ է, սակայն եթե ազատական գաղափարների ընդլայնումը կարող է նպաստել մեր երկրի զարգացմանը, ողջունում է ցանկացած նմանատիպ նախաձեռնություն: Լյուդմիլա Սարգսյանը համոզված է, որ նոր նախաձեռնությունների ծնունդը չի կարող հարվածել Հայ ազգային կոնգրեսի գործունեությանը: