News Georgia-ի փոխանցմամբ` Վրաստանի ԱԳՆ-ն մեկնաբանել է փետրվարի 29-ին Ռուսաստանի Օդա-դեսանտային զորքերի հրամանատար, գեներալ-լեյտենանտ Վլադիմիր Շամանովի այն հայտարարությունը, որ Ռուսաստանը նպատակահարմար է գտնում Օդա-դեսանտային զորքերի առաջին ուղղաթիռային գունդը տեղակայել Նովոռոսիյսկում՝ հաշվի առնելով այն, որ Աբխազիայում ու Հարավային Օսիայում իրավիճակը հաճախ է բարդանում, իսկ Վրաստանի հետ փոխհարաբերություններում լարվածունությունը շարունակ աճում է:
Ի դեպ, Շամանովը հավելել էր, որ դա կարող է տեղի ունենալ արդեն սեպտեմբերին՝ «Կովկաս-2012» խորագրով զորավարժությունների շրջանակներում:
Այս կապակցությամբ Վրաստանի ԱԳՆ-ն հայտարարել է. «Նովոռոսիյսկում Օդա-դեսանտային զորքերի առաջին ուղղաթիռային գնդի տեղակայման մասին Ռուսաստանի մտադրությունը Վրաստանի համար բացահայտ սպառնալիք է: Ոչ մի կասկած չի հարուցում, թե ում դեմ է ուղղված Ռուսաստանի հերթական ագրեսիվ քայլը:
Ակնհայտ է, որ Ռուսաստանը շարունակում է ագրեսիվ քաղաքականություն վարել Վրաստանի նկատմամբ, որն ուղղված է Վրաստանի պետականության դեմ և վրացական բնակչության ոչնչացմանը: Ռուսաստանն ինտենսիվորեն միլիտարիզացնում է Վրաստանի օկուպացրած շրջանները՝ Աբխազիան ու Ցխինվալի շրջանը: 2011 թվականին Ռուսաստանը դրանցում տեղակայել է Точка-У օպերատիվ-տակտիկական հրթիռային համալիրներ և Смерч հրթիռային համազարկի համակարգեր»:
Հիշեցնենք, որ ոչ վաղ անցյալում էլ նշվում էր, թե Ռուսաստանը Հարավային Օսիայում տեղակայել է С-300 զենիթա-հրթիռային համալիր:
