Փետրվարի 28-ից մարտի 1-ն աշխատանքային այցով Ժնևում է ՀՀ ԱԳ նախարարի տեղակալ Աշոտ Հովակիմյանը:
ՀՀ ԱԳՆ մամլո գրասենյակից «Առաջին լրատվական»-ին տեղեկացնում են, որ փետրվարի 29-ին Աշոտ Հովակիմյանը ելույթով հանդես է եկել Մարդու իրավունքների խորհրդի 19-րդ նստաշրջանի բարձրաստիճան հատվածում:
Ելույթում մասնավորապես նշվել են ՀՀ կողմից մարդու իրավունքների պաշտպանության և խրախուսման ոլորտում վերջին զարգացումները` Հայաստանի կողմից միջազգային կոնվենցիաներով ստանձնած պարտավորությունների կատարման ազգային զեկույցների ներկայացման ընթացքը, ՀՀ կառավարության կողմից ՄԱԿ տարբեր կառույցների, այդ թվում պայմանագրային մարմինների, Ընդհանուր պարբերական դիտարկման և հատուկ ընթացակարգերի կողմից ներկայացված առաջարկությունների իրականացման ուղղությամբ ձեռնարկված միջոցառումները, մարդու իրավունքների պաշտպանության ազգային պլանի մշակման ընթացքը:
Աշոտ Հովակիմյանը հատուկ անդրադարձել է ցեղասպանության կանխարգելման խնդրին, որը ՀՀ արտաքին քաղաքականության օրակարգի հիմնական առաջնահերթություններից մեկն է, հատկապես կարևորվեց կրթության դերը մարդկության դեմ ուղղված հանցագործությունների, այդ թվում նաև ցեղասպանությունների կանխարգելման գործում և դրանք դատապարտելու անհրաժեշտությունը` անկախ նրանից, ում կողմից, երբ և որտեղ են դրանք իրականացվել:
ՀՀ արտաքին գործերի նախարարի տեղակալը իր ելույթում անդրադարձել է նաև ժողովուրդների ինքնորոշման իրավունքի սկզբունքին` շեշտելով, որ Լեռնային Ղարաբաղի ժողովուրդն իրականացրել է իր ինքնորոշման իրավունքը և միացել է միջազգային իրավունքի հիմնարար գործիքներին` կիրառելով դրանք ամենօրյա կյանքում: Այս կապակցությամբ Աշոտ Հովակիմյանը համոզմունք է հայտնել, որ համապատասխան ՄԱԿ մարմիններն իրենց հերթին, ելնելով մարդու իրավունքների պաշտպանության համընդհանրությունից` պետք է հանդես գան ամենուր և առանց որևէ սահմանափակման մարդու իրավունքները պաշտպանելու և խրախուսելու դիրքերից:
Ժնև այցելության շրջանակներում Աշոտ Հովակիմյանը երկկողմ հանդիպումներ է ունեցել Վիետնամի և Լիտվայի փոխարտգործնախարարների հետ: Հանդիպումների ընթացքում քննարկվել են միջազգային կազմակերպությունների շրջանակներում համագործակցության հնարավորությունները:
Այցի շրջանակներում նա հանդիպել է նաև Եվրոպական տնտեսական հանձնաժողովի գործադիր քարտուղարի պաշտոնակատար Անդրեյ Վասիլյևի և շրջակա միջավայրի գնահատման Էսպո կոնվենցիայի քարտուղար Նիկ Բոնվուազինի հետ: Հանդիպմանը նշվել է հանձնաժողովի հետ ՀՀ համագործակցության կարևորությունը, քննարկվել կազմակերպության շրջանակներում ՀՀ միջազգային պայմանագրերի կատարմանն առնչվող հարցեր: