Այսօր լրագրողների հետ հանդիպմանը քաղաքագետ Սերգեյ Շաքարյանցը անդրադարձավ տարածաշրջանային զարգացումներին, մասնավորապես Ֆրանսիայի Սահմանադրական խորհրդի կողմից Հայոց ցեղասպանության ժխտումը քրեականացնող օրինագծի մերժմանը։ Քաղաքագետը նշեց, որ ինքը դեռևս դեկտեմբերից էր սպասում նման ավարտի. պատճառն այն է, որ Ֆրանսիայի Հանրապետությունը նախընտրական շրջանում է:
«Ֆրանսիայի ներքին ընտրությունների համար հայկական գործոնը բավականին կարևոր է: Ճիշտ է, մուսուլմանական համայնքը շատ մեծ է, սակայն միայն թուրքերից բաղկացած չէ: Այդ քայլով Սարկոզին նախ ձգտում էր նախընտրական շրջանում ուշադրությունը իր վրա բևեռացնել, ինչպես նաև ձգտել իր վարկանիշը ավելի երկար պահել»:
Շաքարյանցի կարծիքով, սակայն, առաջին պլան պետք է մղել ժամանակակից Հայաստանի արտաքին քաղաքական հարցը, որն ուղղակիորեն առնչվում է իրանական խնդրին:
«Հայաստանում ոչ ոք իրավունք չունի անտեսելու այն, որ Իրանին առնչվող հարցը անմիջականորեն կարող է առնչվել Հայաստանի ազգային անվտանգությանը:
Մյուս կողմից՝ պետք է հաշվի առնել, որ վատթարանում են Ադրբեջան-Իրան հարաբերությունները»,- ասաց քաղաքագետը:
Նա կարևորեց նաև վերջերս Ադրբեջանի և Իսրայելի կողմից կնքված պատմական պայմանագիրը՝ մտահոգություն հայտնելով, որ այս հարցի վերաբերյալ Երևանի կողմից ոչ մի պաշտոնական արձագանք չի նկատվում. «Այսօր բացահայտորեն զինվում է մեր թշնամին: Կարևոր չէ, թե ում դեմ պետք է օգտագործվի այդ ռազմական ուժը: Մեր իշխանությունները պետք է արձագանքեն դրան»:
Քաղաքագետը նաև հավելեց, որ Ադրբեջանը կարող է լեզգիների դեմ օգտագործել այդ ռազմամթերքը՝ հաշվի առնելով այն հանգամանքը, որ վերջերս Ադրբեջանի հյուսիսում` լեզգիական շրջանում, ապստամբություն էր բարձրացել. «Զարմանում եմ, որ մինչ օրս Հայաստանում կան մարդիկ, ովքեր կասկածում են, թե Ադրբեջանը ցանկացած փամփուշտ, հրացան՝ թեկուզ հին, կարող է օգտագործել հայերի դեմ, երբ Ալիևը ամբողջ աշխարհին հայտարարեց, որ հայերը իրենց համար թիվ մեկ թշնամին են»:
Վերադառնալով ներքաղաքական իրավիճակին՝ Շաքարյանցը նշեց. «Ընդդիմադիր ղեկավարը հնչեցնում է հետևյալ բովանդակության կոչեր՝ եթե իրենք զիջեն իշխանությունը, նրանց Քադաֆիի ճակատագիրն է սպասվում։ Անվտանգության ծառայությանը առաջարկում եմ զբաղվել նրանցով. նման մարդիկ մեր երկրի դավաճաններն են»:
