Երևանի «Կոնգրես» հյուրանոցում ամփոփվեցին «Հայաստանի Հելսինկյան կոմիտե» իրավապաշտպան կազմակերպության 2011 թվականին կատարած աշխատանքները: Բացման խոսքով հանդես եկավ Հայաստանի Հելսինկյան կոմիտեի նախագահ Ավետիք Իշխանյանը:
Հանդիպմանը քննարկվելու է «Մարդու իրավունքները Հայաստանում-2011» տարեկան զեկույցը, որում ներառված են հետևյալ թեմաները՝ «Ընտրություններ», «Դատական համակարգ», «Խոսքի ազատություն», «Կրոնի, դավանանքի և խղճի ազատություն», «Հավաքների ազատություն և խաղաղ հավաքների իրավունք», «Խոշտանգումներ և վատ վերաբերմունք», «Ազատության անձնական անձեռնմխելիության իրավունքի խախտման և բռնության դեպքեր» և «Երեխայի իրավունքներ»:
Տարեկան զեկույցը ներկայացնելու է Ավետիք Իշխանյանը, հարակից զեկույցներով հանդես կգան Ռոբերտ Ռևազյանը, Գոհար Ոսկանյանը: Հայաստանի Հելսինկյան կոմիտեի իրականացրած աշխատանքների ամփոփման ժամանակ ներկայացվելու է ևս մեկ ծրագիր՝ «Քաղաքացիական հասարակության և զանգվածային լրատվության միջոցների համագործակցության ապահովումը Հայաստանում»։
Ծրագրի նպատակն է նպաստել քաղաքացիական հասարակության և զանգվածային լրատվության ներկայացուցիչների համագործակցությանը: Այս զեկույցը ներկայացնելու են Լիլիթ Վերդյանը և Խոսքի ազատության պաշտպանության կոմիտեի անդամ Մեսրոպ Հարությունյանը:
Քննարկմանը ներկայացվել է նաև «Ուսուցումից դուրս մնացած երեխաների կրթության իրավունքի պաշտպանության ուսումնասիրությունը» ծրագիրը: Այն կներկայացնի Հասմիկ Հովհաննիսյանը:
Հանդիպման ավարտին ներկաները կքննարկեն կոմիտեի իրականացրած աշխատանքները և այսօր ներկայացված ծրագրերը: