Երևանը գրքի համաշխարհային մայրաքաղաք հռչակելը ծաղր է: Այսօր լրագրողների հետ հանդիպման ժամանակ նման տեսակետ հայտնեց բանաստեղծուհի Հասմիկ Սիմոնյանը`խոսելով վերջին օրերին գրողների շրջանում առաջացած բողոքի ալիքի շուրջ:
Նա նշեց, որ «Դեմ ենք գրքերի թանկացմանը» նախաձեռնությունը արդեն մի որոշ ժամանակ բարձրաձայնում է, որ պետք է վերացվի գրքերի 20% հարկը: Ըստ նրա` այն դեպքում, երբ
Երևանը ճանաչվել է գրքի համաշխարհային մայրաքաղաք, սա ծաղր է: «Երևանը գրքի համաշխարհային մայրաքաղաք է, իսկ մենք հարկերն ենք ավելացնում, ու անընդհատ փակվում են գրախանութներ, որպեսզի վերջին ընթերցողները գիրք չգնեն: Այսինքն`ինչ ենք մենք տեսնում` բացահայտ ծաղր շատ քիչ թվով մարդկանց հանդեպ, ովքեր սիրում են գիրքը»,- նշեց Հ. Սիմոնյանը`հավելելով, որ այս մասին վարչապետի խոսքը կարդալիս կարելի է հեշտությամբ հասկանալ, որ նրա ասածները մեկը մյուսին հակասում են և չեն համընկնում, որի արդյունքում հիմար բան է ստացվում:
Հիշեցնենք, որ երեկ «Դեմ ենք գրքերի թանկացմանը» քաղաքացիական նախաձեռնությունը, գրողները, բանաստեղծները նամակ-բողոք հանձնեցին վարչապետին: Տասնօրյա ժամկետում նախաձեռնության անդամները կստանան իրենց հուզող հարցերի պատասխանները:
«Մենք կանգ չենք առնելու: Այս 10 օրվա ընթացքում կազմակերպելու ենք տարատեսակ միջոցառումներ և փորձելու ենք մեր ծրագրերը կյանքի կոչել հետևողականորեն»,- եզրափակեց իր խոսքը բանաստեղծուհի Հասմիկ Սիմոնյանը:
