Երեկ ուշ երեկոյան Ռուսաստանի վարչապետ և նախագահի թեկնածու Վլադիմիր Պուտինը հանդիպել է համաշխարհային հեղինակավոր մի շարք լրատվամիջոցների ղեկավարների հետ և պատասխանել է նրանց հարցերին: Այս մասին հաղորդում է RIA-Novosti գործակալությունը:
Հանդիպմանը ներկա են գտնվել ճապոնական «Ասախի Սիմբուն», ֆրանսիական Le Monde, իտալական La Repubblica, կանադական Globe և Mail, բրիտանական The Times և գերմանական Handersblatt պարբերականների գլխավոր խմբագիրները:
Խոսելով իր և նախագահ Մեդվեդևի փոխատեղման մասին` Պուտինն ասել է, որ դա բնական էր, քանի որ վերջին 4 տարիների ընթացքում իր վարկանիշը մի փոքր ավելին է եղել, քան Մեդվեդևինը: Պուտինը սա բացատրել է իր նախագահության տարիներին ունեցած հաջողություններով:
ՌԴ վարչապետը վերահաստատել է, որ նախագահ ընտրվելու դեպքում կշարունակի Մեդվեդևի` տնտեսության ազատականացման ծրագիրը` վերջինիս նշանակելով երկրի վարչապետ:
Պուտինը նաև խոսել է երկրում վերջին ամիսների ներքաղաքական լարվածության մասին` ասելով, որ բողոքական տրամադրությունների աճը Ռուսաստանի իշխանություններն ավելի կենսունակ է դարձնում: Նա համաձայնել է, որ մեծ քաղաքներում իր վարկանիշն ավելի ցածր է, քան փոքրերում, սակայն այդտեղ էլ ինքը մեծամասնություն ունի:
ՌԴ վարչապետն անսպասելիորեն հայտարարել է, որ պատրաստ է աջակցել հայտնի բլոգեր և ընդդիմադիր ամենահայտնի գործիչներից մեկին` Ալեքսեյ Նավալնիին` նրա հակակոռուպցիոն նախաձեռնություններում` նշելով, սակայն, որ այդ պայքարը պետք չէ օգտագործել քաղաքական նպատակներով:
Պուտինն անդրադարձել է մի շարք խնդիրների, որոնք վերաբերում են արտաքին քաղաքականությանը` վերահաստատելով նախկինում հնչեցրած իր տեսակետները: